ऐतिहासिक आन्दोलनको स्मरणमा आज पनि जेठ १ गते लाई विद्यार्थी एकता दिवसका रूपमा मनाउने गरिएको अखिल (समाजवादी)का केन्द्रीय सचिव एवम् गण्डकी प्रदेश इञ्चार्ज प्रकाश बास्तोलाले जानकारी दिए ।

पोखरा, १ जेठ । ६१ औं विद्यार्थी एकता दिवसको अवसरमा नेपाल कम्युनिस्ट पार्टी (विप्लव) निकट विद्यार्थी संगठन अखिल नेपाल राष्ट्रिय स्वतन्त्र विद्यार्थी यूनियन (समाजवादी)ले बिहीबार सहिद स्मृति आवासीय माध्यमिक विद्यालयमा वृक्षारोपण कार्यक्रम सम्पन्न गरेको छ ।

अखिल समाजवादीका केन्द्रीय सचिव एवम् गण्डकी प्रदेश इञ्चार्ज प्रकाश बास्तोलाले आजको दिनलाई ऐतिहासिक संघर्षको स्मरण गर्दै संघर्ष, बलिदान र एकताको प्रतीकस्वरूप हरेक वर्ष जेठ १ गते विद्यार्थी दिवस मनाउने परम्परा रहेको जानकारी दिए ।

वृक्षारोपण कार्यक्रममा अखिल समाजवादीका केन्द्रीय सचिवालय सदस्य एवम् कास्की जिल्ला इञ्चार्ज पुरन पुन, केन्द्रीय सदस्य अशोक महतार, कास्की जिल्ला अध्यक्ष केस घले र सहिद स्मृति माविका विद्यार्थीहरुले विद्यार्थी आन्दोलनको स्मरण गर्दै वृक्षरोपणमा सहभागी भएका थिए ।

वि.सं. २०२१ सालमा त्रिचन्द्र कलेजका विद्यार्थीहरूको नेतृत्वमा काठमाडौंका विभिन्न कलेजका विद्यार्थीहरू निरंकुश पंचायती व्यवस्थाविरुद्ध उभिएर व्यापक आन्दोलनमा उत्रेका थिए। तत्कालीन शासनप्रणालीका विरुद्धमा उठेको यो आन्दोलनले राष्ट्रको सार्वभौमिकता, राष्ट्रियता र विद्यार्थीका अधिकारका पक्षमा उल्लेखनीय हस्तक्षेप गरेको थियो ।

आन्दोलनको क्रममा त्रिचन्द्र कलेज विद्यार्थी युनियनको पहलमा अन्तरकलेज विद्यार्थी सम्मेलन सम्पन्न भएको थियो। सो सम्मेलनले विविध मागसहित संघर्षको रूपरेखा तय गरेको थियो । प्रमुख मागमा गोर्खा भर्ती केन्द्रको खारेजी, राष्ट्रघाती सन्धिहरूको अन्त्य, स्वतन्त्र विद्यार्थी युनियनको पुनःस्थापना र बन्दी विद्यार्थीहरूको रिहाइ रहेका थिए ।

सम्मेलनपछि जेठ १ गते विशाल विद्यार्थी ¥याली आयोजना गरिएको थियो। उक्त ¥यालीमाथि प्रहरीले बल प्रयोग गरेपछि झडपको स्थिति उत्पन्न भएको थियो । जसमा सयौं विद्यार्थी घाइते बनेका थिए भने एकसय ५०जना भन्दा बढी पक्राउ परेका थिए ।

झडपपछिको दवावस्वरूप सरकारले आन्दोलनकारीहरूको प्रमुख मागहरूमा सहमति जनाउँदै स्वतन्त्र विद्यार्थी युनियनको अधिकार पुनःस्थापना गर्नुका साथै थुनामा रहेका विद्यार्थीहरूलाई रिहा गर्न बाध्य भएको थियो।

त्यही ऐतिहासिक आन्दोलनको स्मरणमा आज पनि जेठ १ गते लाई विद्यार्थी एकता दिवसका रूपमा मनाउने गरिएको विद्यार्थी नेता बास्तोलाको भनाई थियो ।