पोखरा । गण्डकी प्रदेशमा कोरोना संक्रमणका कारण आज पनि चारजनाले ज्यान गुमाउन पुगेका छन् । गण्डकी प्रदेशमा मृत्यु हुनेको संख्या एकसय ७ पुगेको स्वास्थ्य निर्देशनालय गण्डकी प्रदेशले आज जारी गरेको विज्ञप्तिमा उल्लेख छ ।

होम आईसोलेसनमा रहेका पोखरा महानगरपालिका वडा नं. १३ का ९२ वर्षीय कोरोना संक्रमित पुरुषको हिजो घरमा नै निधन भएको छ । ती पुरुषलाई कार्तिक १६ गते कोरोना संक्रमण पुष्टि भएको स्वास्थ्य निर्देशनालयले आज जारी गरेको विज्ञप्तिमा  उल्लेख गरेको छ ।

त्यसैगरी, स्याङ्जा जिल्ला, गल्याङ नगरपालिका वडा नं. ७ का ५० वर्षीय कोरोना संक्रमित पुरुषको पनि आज विहान ७ः४५ बजे लुम्बिनी मेडिकल कलेज, पाल्पामा उपचारका क्रममा निधन भएको छ । ती पुरुषलाई कार्तिक १८ गते कोरोना संक्रमणको पुष्टि भएको थियो । ती पुरुषमा एक्युट इस्केमिक सिभिए (सेरेभ्रो भास्कुलर एक्सिडेण्ट), डाईभेटिज मलाईटस लगायतका समस्याहरु रहेको अस्पतालले जनाएको छ ।

स्वास्थ्य निर्देशनालय गण्डकी प्रदेशले दिउँसो १ बजे जारी गरेको विज्ञप्ति अनुसार कोरोना संक्रमित पोखराका दुईजनाको मृत्यु भएको छ । पोखरा महानगरपालिका वडा नं. ८ का ६७ वर्षीय पुरुषको आज विहान १ः१६ बजे गण्डकी मेडिकल कलेज पोखरामा उपचारका क्रममा निधन भएको हो । ती पुरुषलाई कार्तिक १३ गते कोरोना संक्रमण पुष्टि भएको थियो । ती पुरुषमा निमोनियाको समस्या रहेको थियो ।

त्यसैगरी पोखरा महानगरपालिका वडा नं. ९ का ७५ वर्षीय महिलाको आज विहान ५ः१५ बजे गण्डकी मेडिकल कलेज पोखरामा उपचारका क्रममा निधन भएको छ । ती महिलालाई कार्तिक १८ गते कोरोना संक्रमणको पुष्टि भएको थियो । ती महिलालाई निमोनियाको समस्या रहेको अस्पतालले जानकारी दिएको छ ।

गण्डकी प्रदेशमा आजमात्र एकसय ४० जना नयाँ कोरोना संक्रमितहरु थपिएका छन् । अहिलेसम्मको अध्यावधिक तथ्याङ्क अनुसार यस प्रदेशमा कोरोना संक्रमितको संख्या नौं हजार एकसय ५८ पुगिसकेको छ ।