मुस्ताङ, ५ मंसिर । मुस्ताङमा जित हासिल गर्दै नेपाली कांग्रेसले प्रतिनिधिसभा सदस्यमा पहिलो मतपरिणाम हात पारेको छ । कांग्रेस र माओवादी केन्द्र लगायत गठबन्धनका तर्फबाट साझा उम्मेदवार रहेका २९ वर्षीय योगेश गौचन थकालीले पहिलो खाता खोलेका हुन् ।

देशभरका एकसय ६५ निर्वाचन क्षेत्रमध्ये मुस्ताङबाट प्रतिनिधिसभा सदस्यका लागि थकालीले एमालेका उम्मेदवार ६० वर्षीय प्रेमप्रसाद तुलाचनलाई पराजित गरेका छन् ।

सार्वजनिक मत परिणाम अनुसार गौचनले ३ हजार ९९२ मत प्राप्त गरेका छन् भने एमालेका तुलाचनले ३ हजार ७८ मत प्राप्त गरेका हुन् । एउटा मात्र निर्वाचन क्षेत्र रहेको मुस्ताङमा राष्ट्रिय स्वतन्त्र पार्टीका उम्मेदवार सुदेश गुरुङले ८७ मत ल्याएका छन् ।

नवनिर्वाचित योगेश कांग्रेसका जिल्ला सभापति एवं पूर्वसांसद रोमी गौचन थकालीका छोरा हुन् ।