निर्वाचन आयोगका अनुसार आइतबार बिहान ७ बजेदेखि मतदान सुरू भएकोमा मध्याह्न २ः०० बजेसम्म देशभर ४६ प्रतिशत भन्दा बढि मतदान भईसकेकोे हो ।

काठमाडौं, ४ मंसिर । प्रमुख निर्वाचन आयुक्त दिनेशकुमार थपलियाले आज भइरहेको संसदीय चुनावमा ७० प्रतिशत बढी मत खस्ने बताएका छन् ।सञ्चारमाध्यमसँग कुराकानी गर्दै प्रमुख निर्वाचन आयुक्त थपलियाले भने–‘७० प्रतिशत बढी मत खस्छ भन्नेमा हामी ढुक्क छौं ।’ साँझ ५ बजे मतदान सकिएपछि ७ बजेसम्म मत पेटिका संकलनको काम गर्ने र ८–९ बजेबाट मतगणना सुरू गर्ने योजना रहेको उनले जानकारी दिएका छन् ।

‘सुरूमा प्रत्यक्षतर्फ प्रतिनिधि सभा र प्रदेश सभाको मतगणना हुन्छ । ८ दिनमा सबै नतिजा सार्वजनिक गरिसक्ने योजना छ,’ थपलियाले भने । अहिलेसम्म प्रतिनिधिसभा र प्रदेशसभा सदस्यको निर्वाचनअन्तर्गत देशभर ४६ प्रतिशत मत खसेको छ । निर्वाचन आयोगका अनुसार आइतबार बिहान ७ बजेदेखि मतदान सुरू भएकोमा मध्याह्न २ः०० बजेसम्म देशभर ४६ प्रतिशत भन्दा बढि मतदान भईसकेकोे हो ।

देशैभरि सामान्य छिटपुट घटनाबाहेक उत्साहजनकरुपमा मतदान कार्य भइरहेको छ । आयोगले कतिपय ठाउँमा विभिन्न विषयमा विवाद हुँदा केहीबेर मतदान रोकिए पनि पुनः मतदान सुरु भइसकेको जनाएको छ ।

त्यसैगरी, आयोगले परामर्श नगरी मतदान कार्य स्थगित नगर्न निर्देशन दिएको छ । मतदाता नामावलीमा मतदाताको नाम नभेटिए आयोगको टोल फ्रि नम्बर ११०२ मा फोन गरेर सहयोग लिनसमेत आग्रह गरेको छ ।