पोखरा, ६ कार्तिक । विभिन्न संघसंस्था र राज्यका जिम्मेवार निकायमा बसेर उल्लेखनीय काम गरी चर्चा कमाएका माओवादी नेता विश्वप्रकाश लामिछानेले यसपटकको प्रदेशसभा सदस्यमा आमजनताले अत्याधिक मतका साथ विजयी गराउनेमा ढुक्क देखिएका छन् ।

‘राज्यले यस अघि आफूलाई मौका दिँदा कामयावी योजना निर्माण र कार्यान्वयनसमेत गरेकाले मलाई जनताप्रति पूर्ण विश्वास छ,’ कास्की २ (क) मा प्रदेश सभा सदस्य पदका लागि गठबन्धन दलका साझा उम्मेदवार बनेका लामिछानेले भने–‘पोखरालाई समृद्ध बनाउने र आधुनिक महानगर बनाउने योजना हामीसँग छ ।’

पोलिटिकल साइन्स सोसाइटी नेपालले आज आइतबार आयोजना गरेको कार्यक्रममा उनले भने, ‘राज्यले दिएका सानातिना जिम्मेवारी आजसम्म सफलतापूर्वक पूरा गरेको छु । अब पनि जनताले थप जिम्मेवारी दिनुभयो भने निराश नबनाउने खालको खाका मसँग छ ।’

आइतबारै पोखरा ७ मा भएको कार्यक्रममा लामिछानेले सत्ता गठबन्धनबिना देश अघि बढ्न नसक्ने तर्क गरे । एमाले नेतृत्वको सरकारले पटक पटक प्रतिगमन गरेको दाबी गर्दै उनले स्थिरता र समृद्धिका लागि गठबन्धनको विकल्प नभएको जनाए ।

गठबन्धनको पोखरा १७ को सम्पर्क कार्यालय उद्घाटन कार्यक्रममा उनले संविधानको रक्षाका लागि बनेको गठबन्धनलाई जनताले अनुमोदन गर्ने जनाए । उनले भने, ‘यो गठबन्धनले देशलाई अनिश्चयको यात्राबाट जोगाएको छ । कसलाई मत दिँदा देशको विकास हुन्छ भन्ने जनतालाई थाहा छ ।’

लामिछानेले पोखराको विकासका लागि बनेका योजना कार्यान्वयन र संविधानमा उल्लिखित मौलिक हक ग्यारेन्टी गर्न आफूले योगदान गर्ने उल्लेख गरे । सत्ता गठबन्धनका साझा उम्मेदवार लामिछाने पोखराका प्राकृतिक सम्पदाको संरक्षण, सार्वजनिक जमिनको रक्षा र विकास निर्माणका कार्यमा विभिन्न निकायमा हुँदा लोकप्रिय काम गरी साझा विकासप्रेमी नेताको छवि बनाएका पात्र हुन् ।