पोखरा, ५ कार्तिक । देशका सातै प्रदेशका विभिन्न सञ्चारमाध्यममा कार्यरत पत्रकारहरुका लागि निर्वाचन निष्पक्ष रिपोर्टिङ तथा दुष्प्रचार र घृणायुक्त अभिव्यक्तिको रोकथाम विषयक कार्यशाला सम्पन्न भएको छ ।

आगामी मंसिर ४ गते हुने प्रतिनिधि तथा प्रदेश सभा निर्वाचनका समयमा आउन सक्ने भ्रामक, दुष्प्रचार र द्वेष फैलाउने किसिमका समाचारलाई रोक्दै निष्पक्ष भएर पत्रकारिता गर्न सचेत गराउने उद्देश्यले मिडिया एक्सन नेपालले उक्त कार्यशालाको आयोजना गरेको हो ।

विभिन्न चरणमा असोज १२ देखि सुरु भएको एक दिने प्रदेशस्तरीय कार्यशालाको अन्तिम दिन शुक्रबार गण्डकी प्रदेशको राजधानी पोखरामा सम्पन्न भएको छ । कार्यशालाका सहजकर्ता तथा मिडिया एक्शन नेपालका अध्यक्ष लक्ष्मणदत्त पन्तले पत्रकारले विशेषत निर्वाचनको समयमा समाचारको तथ्य जाँच पटक–पटक गर्नुपर्नेमा जोड दिए । उनले निर्वाचनका बेला उम्मेदवार तथा राजनीतिक दलहरुले पत्रकारलाई माध्यम बनाएर आफ्नो प्रचारप्रसार गर्नसक्ने भएकाले पत्रकार अझ बढी चनाखो बन्नुपर्ने बताए ।

नेपाल पत्रकार महासंघ कास्कीका अध्यक्ष विमला भण्डारीले निर्वाचनको समयमा पत्रकार कुनै प्रलोभनमा नपरी सत्य समाचार बाहिर ल्याउनुपर्नेमा जोड दिईन् । अहिलेसम्मको निर्वाचनमा गण्डकी प्रदेशमा अमर्यादित तथा भ्रामक किसिमका समाचार सम्प्रेषण कमै हुने गरेको दावी गर्दै उनले पत्रकारिताको आचारसंहिता भित्र रहनुपर्नेमा सचेत गराईन् ।

मिडिया एक्शन नेपालका सचिव गनेश घिमिरेले पत्रकारले मानवअधिकारको मुद्दामा संवेदनशील र सन्तुलित भएर रिपोर्टिङ गर्नुपर्नेमा जोड दिए । यस्तै कार्यशालाका सहजकर्ता मानवअधिकार विशेषज्ञ सन्तोष क्षेत्रीले डिजिटलाइज्ड समयमा पत्रकारका कारण दुष्प्रचार तथा द्वेष सजिलोसँग फैलन सक्ने जोखिम भएकाले शब्द चयन तथा समाचारको दृष्टिकोणमा संवेदनशील हुन पत्रकारलाई आग्रह गरेका छन् ।

कार्यशालामा सहभागी पत्रकार सुमन गुरुङले निर्वाचनमा राजनीतिक दल र भोटमात्र नभई निर्वाचनका अन्य मुद्दामा पनि लेख्ने बताउदैं निष्पक्ष रिपोर्टिङ गर्ने प्रतिबद्धता जनाएका थिए । यस्तै पत्रकार रिना थापाले कार्यशाला फलदायी भएको भन्दै दुष्प्रचार हुनसक्ने जोखिमबाट सचेत भई रिपोर्टिङ गर्ने बताईन् । कार्यशालामा २० जना पत्रकारको उपस्थिति रहेको थियो ।