पोखरा, २४ असोज । गठबन्धन विरुद्ध विद्रोह गर्दै नेपाली कांग्रेसका नेता महादेव गुरुङले कास्की निर्वाचन क्षेत्र नं. २ बाट स्वतन्त्र उम्मेदवारी दर्ता गराएका छन् । गठबन्धनका तर्फबाट एकीकृत समाजवादीको भागमा परेको यो क्षेत्रबाट गुरुङले मनोनयन दर्ता गरेका हुन् ।

कांग्रेसका पुराना, जुझारु एवं पूर्वराज्यमन्त्री गुरुङको उम्मेदवारी दर्तामा प्रस्तावकका रुपमा बालगोपाल श्रेष्ठ र समर्थकमा सूर्य लम्साल रहेका छन् ।
यता, सत्ता गठबन्धनका तर्फबाट कास्की क्षेत्र नं. २ मा नेकपा एकीकृत समाजवादीका श्रीनाथ बरालले उम्मेदवारी दर्ता गराएका छन् ।

गुरुङले कांग्रेसले आफ्नो आदर्श, मूल्य, मान्यता र सिद्धान्तबाट विचलित भएको भन्दै उम्मेदवारी दिएको बताए । आफूसँग जनता भएको र पहिला पनि चुनाव जितेको हुँदा जनताले पुनः जिताउनेमा उनी ढुक्क देखिन्छन् । यदि, गुरुङले उम्मेदवारी फिर्ता नलिने हो भने गठबन्धनका उम्मेदवार बराललाई ठुलो धक्का लाग्ने कांग्रेस कार्यकर्ताहरुको भनाई छ । गठबन्धनका नाममा पुराना, इमान्दार र राष्ट्रभक्त नेताहरुमाथि अन्याय हुँदै गएपछि त्यसैको विरोधमा नेता गुरुङले विद्रोह गर्नुपर्ने बाध्यात्मक अवस्था आएको कांग्रेस कार्यकर्ताहरुको बुझाई छ ।

यता, कास्की– ३ बाट प्रतिनिधि सभा सदस्यका लागि सत्ता गठबन्धन र एमाले दुबैका विरूद्ध बागी उम्मेदवारी परेको छ । माओवादी उम्मेदवारका विरुद्ध सहिद पुत्री र एमालेका नेता विरुद्ध कार्यकर्ताले बागी उम्मेदवारी दिएका हुन् ।

माओवादी केन्द्रका तर्फबाट कास्की क्षेत्र नं. ३ मा नेता रामजी बरालको उम्मेदवारी परेकोमा उनका विरुद्ध सहिद पुत्री अनिता भुर्तेलले स्वतन्त्र उम्मेदवारी दर्ता गराएकी हुन् । पार्टीले सहिद, वेपत्ता, घाइते, अपाङ्ग परिवारप्रति वेवास्ता गरेको भन्दै सहिद पुत्री अनिताले उम्मेदवारी दिएकी हुन् ।

एमालेले उक्त क्षेत्रबाट दामोदर पौडेल ‘बैरागी’ लाई उठाएको छ। बैरागीले उम्मेदवारी दिएपछि एमाले कार्यकर्ता जगन्नाथ बास्तोलाले स्वतन्त्र उम्मेदवारी दिएका हुन् । बास्तोलाले पार्टीले उचित मूल्यांकन नगरेको भन्दै बागी उम्मेदवारी दिनु परेको बताएका छन् ।