पोखरा, २६ असार । पोखरा महानगरपालिकाका मेयर तथा पोखरा उपत्यका नगर विकास समितिका अध्यक्ष मानबहादुर जिसीले पर्यटकीय बसपार्क, गल्फ कोर्स र यातायात कार्यालय पछाडिको सार्वजनिक जमिन भाडामा दिएको विषयमा छानबिन गर्नका लागि पाँच सदस्यीय समिति गठन गरिएको छ ।

पोखरा उपत्यका नगर विकास समितिको शनिबार बिहान बसेको बैठकले सार्वजनिक जमिन भाडामा दिएको विषयमा छानबिन गर्न नापी कार्यालय कास्कीका प्रमुख दिनेश काफ्लेको संयोजकत्वमा ५ सदस्यीय छानबिन समिति गठन गरेको हो । एक हप्ता भित्र प्रतिवेदन बुझाउने गरी गठन गरिएको समितिको सदस्यमा पोखरा महानगरपालिका वडा नम्बर ५ का वडाध्यक्ष विष्णु बराल, एकीकृत समाजवादीका उपाध्यक्ष झपिन्द्रराज रेग्मी, नेपाली कांग्रेसका सचिव देवेन्द्र रानाभाट र कानुन व्यवसायी सुकदेव गौतम रहेका छन् ।

पोखरा उपत्यका नगर विकास समितिका अध्यक्ष समेत रहेका जिसीले आफ्नो कार्यकाल सकिन दुई दिन बाँकी रहेको समयमा आफ्नै ज्वाईलाई सरकारी जमिन कौंडीको भाऊमा बर्षौंका लागि ठेक्कामा दिएका थिए । अरुको सहारा बिना हिडडुल गर्न नसक्ने र दोहोरो सवाल–जवाफ गर्न नसक्ने मेयर जिसीलाई उनकै ज्वाई राम भण्डारीको समूह र मेयरको सचिवालयले चोरबाटोबाट यस्तो कार्य गरेको थियो ।

गैरकानुनी ढंगबाट विधि र प्रक्रिया मिचि गरिएको सम्झौंता तत्कालै रोकी खारेज गर्नुपर्ने आवाज उठिरहेको समयमा निवर्तमान मेयर तथा अध्यक्ष जिसीले कानुन सम्मत नै ठेक्का दिएको दावी गर्दै प्रेस विज्ञप्ति नै जारी गरेका थिए । ६३ रोपनी भन्दा बढि जमिन तोक आदेशका भरमा ठेक्कामा दिइएपछि समितिले ठेक्का प्राप्त गरेको समूहलाई काम अगाडि नबढाउन निर्देशन समेत दिइसकेको छ ।