काठमाडौं, १६ जेठ । प्रतिकूल मौसम र जटिल भौगोलिक अवस्थाका कारण तारा एयरको ट्वीनअटर विमान दुर्घटनाग्रस्त भएको प्रारम्भिक अनुसन्धानबाट खुलेको छ । नियामक निकाय नेपाल नागरिक उड्डयन प्राधिकरणका महानिर्देशक प्रदीप अधिकारीले खराब मौसमका कारण तारा एयरको विमान दुर्घटना भएको जानकारी दिनुभयो ।

संसद्को अन्तर्राष्ट्रिय समितिको आजको बैठकमा दुर्घटनाग्रस्त जहाजका बारेमा समितिलाई जानकारी गराउँदै महानिर्देशक अधिकारीले खराब मौसमका कारण ‘राईट टर्न’ गर्नुपर्ने जहाजले ‘लेफ्ट टर्न’ गर्दा भित्तामा ठोक्किन पुगेको प्रारम्भिक अध्ययनले देखाएको बताउनुभयो ।

पोखराबाट आइतबार बिहान ९ः५५ बजे जोमसोमका लागि उडेको उक्त विमान १०ः७ बजेपछि सम्पर्कविहन भएको थियो । जहाज मुस्ताङको थासाङ गाउँपालिका वडा नं. २ सानुसरेड डाँडाको १४ हजार ५०० फिट उचाईमा दुर्घटनाग्रस्त अवस्थामा फेला परेको थियो ।

सोमबार साँझमात्र नेपाली सेनाको हेलिकप्टरबाट १० जनाको शव पोखरा हुँदै काठमाडौं ल्याइएको हो । तारा एयरमा सवार सबै यात्रुको शव काठमाडौं ल्याई सकिएको छ । ती शवलाई अन्तर्राष्ट्रिय विमानस्थलबाट पोस्ट मार्टमका लागि टिचिङ अस्पताल लगिएको छ । स्थानीयसहित नेपाल प्रहरी, सशस्त्र प्रहरी बल र नेपाली सेनाको उद्धार टोलीको सहयोगबाट शव काठमाडौं ल्याइएको हो ।