उक्त दुर्घटनामा गोर्खा जिल्लाको शहीद लखन गाउँपालिका–५ को तिनपानेका पनि एकै परिवारका ४ जना सदस्यको पनि मृत्यु भएको छ ।

पोखरा, १६ जेठ । पोखराबाट जोमसोम जाने क्रममा हिजो वेपत्ता भएको तारा एयरको विमान दुर्घटनामा परेर मृत्यु हुनेहरुमध्ये १६ जनाको शव भेटिएको छ । तीन चालक दलका सदस्यसहित २२ जना सवार तारा एयरको जहाज मुस्ताङको थासाङ गाउँपालिका–२ सानसुरे भन्ने भीरमा ठोक्किएर दुर्घटना भएको थियो ।

दुर्घटनामा परी १२ जनाको शव छरिएको अवस्थामा र २ जनाको शव चेपिएको अवस्थामा फेला परेको नेपाल नागरिक उड्डयन प्राधिकरणका प्रवक्ता देवचन्द्र लाल कर्णले जानकारी दिएका छन् । बाँकी अन्यको खोजी कार्य जारी रहेको छ । भीरबाट सबै शव निकालिसकेपछि काठमाडौं पठाउने तयारी भइरहेको र दुर्घटनमा मृत्यु भएका यात्रुका आफन्तलाई काठमाडौं नैं बोलाइएको प्रहरीले जानकारी दिएको छ ।

शव तथा सुरक्षित रहेका सामान संकलन गरी हेलिकोप्टरबाट काठमाडौं ल्याउने तयारी भएको प्रवक्ता कर्णले बताए । सो दुर्घटनामा परी धनुषाको मिथिला नगरपालिका ११ लोटागाउँका एकै परिवारका ७ जनाको मृत्यु भएको थियो । विमान दुर्घटनाग्रस्त भएपछि लोटागाउँ नै शोकमा डुबेको छ ।

त्यसैगरी, उक्त दुर्घटनामा गोर्खा जिल्लाको शहीद लखन गाउँपालिका–५ को तिनपानेका पनि एकै परिवारका ४ जना सदस्यको पनि मृत्यु भएको छ । सो जहाजलाई क्याप्टेन प्रभाकरप्रसाद घिमिरेले उडाएका थिए भने को पाइलटमा उत्सव पोखरेल र एयर होस्टेज किस्मी थापाको पनि उक्त दुर्घटनामा परी मृत्यु भएको छ ।

हिजो बिहानदेखि हराएको तारा एयरको नाइन एन ए इटी कलसाइनको विमान आज बिहान मुस्ताङको थासाङमा दुर्घटनाग्रस्त अवस्थामा फेला परेको थियो। हिजो विहान ९ बजेर ५५ मिनेटमा पोखराबाट जोमसोमका लागि उडेको विमान १० बजेर ७ मिनेटदेखि सम्पर्कविहीन भएको थियो।