पोखरा, ६ जेठ । पोखरा महानगरपालिकाको मेयर पदमा गठबन्धनका तर्फबाट साझा उम्मेदवार नेकपा एकीकृत समाजवादीका उम्मेदवार धनराज आचार्यको जीत सुनिश्चित भएको छ । उपमेयरमा भने नेकपा एमालेकी मञ्जु गुरुङको सम्भावना जीतको धेरै नजिक देखिएको छ । आजसम्म गणना भएको १ लाख २५ हजार ५ सय २० मतको स्थिति हेर्दा मेयरमा आचार्य र उपमेयरमा गुरुङ जीतको नजिक पुगेका हुन् ।

१ लाख २५ हजार ५ सय २० मत गणना ४ हजार २९ मतको अन्तरले एकीकृत समाजवादीका आचार्यले निरन्तर अग्रता कायम गरिरहेका छन् । ५० हजार ६ सय १२ मतका साथ आचार्यले अग्रता कायम गरेका हुन् । उनलाई एमालेका कृष्ण थापाले ४६ हजार ५ सय ८३ मतका साथ पछ्याईरहेका छन् । त्यस्तै राप्रपाका शंकर खरालले ५ हजार ३ सय ३७ र लौरो चिन्नका उम्मेदवार खड्कराज (गनेश) पौडेलले २ हजार ८ सय ६४ मत प्राप्त गरेका छन् ।

उपमेयरमा नेकपा एमालेकी मञ्जु गुरुङले ५३ हजार १ सय ७३ मतका साथ अग्रता लिइरहेकी छन् । उनले नेपाली कांग्रेसकी उम्मेदवार कोपिला रानाभाटलाई ३ हजार ५ सय ८७ मतान्तरले पछि पार्दै अग्रता लिएकी हुन् । कांग्रेसकी उम्मेदवार रानाभाटले ४९, ५ सय ८६ मत प्राप्त गरेकी छिन् । पछिल्लो तथ्याङ्क हेर्दा उपमेयरमा गुरुङ पनि जीतको नजिक पुगेकी छिन् । त्यसैगरी राष्ट्रिय प्रजातन्त्र पार्टीका उपमेयरका उम्मेदवार रञ्जना सेनले ५ हजार ३ सय १८ मत प्राप्त गरेकी छिन् ।