पोखरा, ७ जेठ । कास्कीको मादी गाउँपालिकामा अपराधिक पृष्ठभूमि भएका एक टोले गुन्डालाई नेकपा एमालेले चुनावी मैदानमा उतारे पनि त्यहाँका जनताले हराएर गण्डकी प्रदेशमा अर्को दीपक मनाङे जन्मिनबाट जोगाएका छन् ।

यदि नेकपा एमालेले राम्रो पृष्ठभूमि भएको पात्र मादी गाउँपालिकामा उठाएको भए नेपाली कांग्रेसलाई चुनाव जित्न हम्मे हम्मे पर्ने थियो । तर मादी गाउँपालिकामा नेपाली कांग्रेसका देवीजंग गुरुङले गुन्डागर्दीको पृष्ठभूमि भएका एमालेका उम्मेदवार शिवबहादुर गुरुङ उर्फ महेन्द्रे भोटेलाई सजिलैसँग पराजित गरे । जबकी गठबन्धनबाट उम्मेदवार बनेका लालबहादुर गुरुङलाई सजिलैसँग एमालेकी उपाध्यक्षकी उम्मेदवार कल्पना गुरुङले हराउन सफल भएकी थिईन् । खराब पृष्ठभूमि र व्यवसायमा आवद्ध भएको पात्र रोज्दा एमालेले मादीमा हार व्यहोर्नु परेको एमालेजनहरु नै बताउँछन् ।

अपराधिक पृष्ठभूमिका महेन्द्र भोटे बर्षौंसम्म प्रहरीको मोस्ट वाण्टेड सूचीमा परेका र पोखराका विभिन्न अपराधिक घटनाहरुमा संलग्न भएका गुन्डागर्दी पृष्ठभूमिका पात्र हुन् । राजनीतिमा अपराधिक पृष्ठभूमिका पात्र प्रवेश गरेपछि के कस्तो हुन्छ भनेर भोग्दै गरेको गण्डकी प्रदेशले अर्को दीपक मनाङे जन्मिनबाट रोक्न मादीका गाउँलेहरु सफल भएका हुन् । दिनदाहाडै कर्मचारीहरु कुट्ने, जनता कुट्ने, वरपर गुन्डाहरुको ताँती राखेर मन्त्रालयमा बस्ने प्रवृत्तिलाई निरुत्साहित गर्न पनि यसपटक मादीका गाउँलेहरु एकजुट भएका छन् ।

अहिले पनि पोखरामा रात्रिकालिन व्यवसाय ट्रेजर लाउन्च बार सञ्चालन गर्ने उनी राजनीतिको आडमा आफ्नो धन्दा भित्रभित्रै चलाई रहेका छन् । नेपाली कांग्रेसको आडमा पोखरामा ‘एलजी ग्रुप’बाट गुन्डागर्दी गर्ने महेन्द्रे भोटे पछि राजिव पहारीले एमालेमा प्रवेश गराएका थिए । हाल उनी एमालेको युवा संगठनमा आवद्ध छन् ।

गुन्डागर्दी पृष्ठभूमि भएका अधिकांश टोले गुन्डाहरुले देशभरी नै सञ्चालन गर्ने भनेको नाईट क्लब, डिस्को बार र रात्रिकालिन व्यवसाय नै हो । जहाँ गुन्डागर्दीको बलमा राज गर्न सकिन्छ । त्यस्तो व्यवसायमा संलग्न भएका धेरै अपराधिहरु पछिल्लो समय आफू सुरक्षित हुनका लागि राजनीतिमा घुस्ने गरेका छन् । राजनीतिको आवरणमा सुरक्षित भएर गुन्डागर्दी, हप्ता असुली, लागूऔषध कारोबार, देह व्यापारको अखडा लगायतका धन्दाहरु सञ्चालन गर्ने गरेको प्रष्टसँग देख्न सकिन्छ । प्रहरीबाट सुरक्षित हुँदै नेताको संरक्षणबाट मौंलाउँदै गएको यो प्रवृत्ति पछिल्लो पटक स्वयं नैं नेताका रुपमा प्रकट हुन थालेका छन् । जसले गर्दा आमजनताहरु त्रसित र भयवित छन् ।

तत्कालिन अवस्थामा शिबबहादुर गुरुङ उर्फ महेन्द्रे भोटेले सञ्चालन गरेको ओजन डिस्कोमा एकजना प्रहरी भीमबहादुर रानालाई टाउको नै रडले हानेर फुटालेपछि प्रहरीले दर्जनौं गुन्डासहित भोटेले पक्राउ गरी थुनामा राखेको थियो । सो मुद्दामा धेरैलाई जेल नै चलान गरेको थियो कास्की प्रहरीले । सोही समयमा प्रकाशित स्थानीय पत्रिका डन न्यूज दैनिकको समाचार । फाईल तस्विर

जसले प्रहरीको नै टाउको फुटाल्न पछि परेनन्, के उनीहरुले जनतालाई बाँकी राख्थे त ? : पोखराको लेकसाईडमा महेन्द्र भोटेले सञ्चालन गरेको ओजन डिस्को भित्र भएको घटना । जहाँ महेन्द्रे भोटे लगायतका गुन्डाहरुको टोलीले प्रहरी भीमबहादुर रानालाई टाउकोमा रडले हानेर रक्तमुछिल बनाएका थिए । फाईल तस्विर