पोखरा, २९ चैत । पोखरा महानगरपालिकाको मेयरको लागि नेकपा एमालेबाट १२ जना आकांक्षी देखिएका छन् । एमाले महानगर कमिटीको आज मंगलबारको बैठकमा १२ जनाले नाम दर्ता गराएका छन् । नगर कमिटीले मेयरका आकाङ्क्षीलाई पार्टीबाट सिफारिस हुनका लागि आज मङ्गलवार नाम सङ्कलन गर्न आह्वान गरेको थियो।

यसरी मेयरको लागि नाम दर्ता गराउनेहरुमा केन्द्रीय सदस्यहरु भीम कार्की, कृष्ण थापा, राजीव पहारी, मीनाकुमारी गुरुङ, प्रदेश कमिटी उपसचिव रश्मि आचार्य, पोखरा १३ का वडाध्यक्ष दर्शन लामा, प्रा.डा. विश्वकल्याण पराजुली, पुष्पज्योति ढुंगाना, पुष्पराज अधिकारी, दीपक पौडेल, बालकृष्ण काउछा मगर, सावित्री भण्डारी रहेका छन् । मेयरका लागि बहालवाला उपमेयर मञ्जुदेवी गुरुङको पनि नाम चर्चामा रहेपनि पार्टीमा उनले उम्मेदवारी भने दर्ता गराएकी छैनन् । महानगर कमिटीले ३ जनाको नाम मेयरमा सिफारिस गर्न प्रयास गरे पनि सहमति भने हुन सकेन ।

त्यसैगरी, पोखरा महानगरपालिकाको उपमेयरमा पनि ११ जनाले आकांक्षा देखाएका छन् । पोखरा १९ का वडाध्यक्ष शोभामोहन पौडेल, वामदेव ढुंगाना, टीकाराम पंगेनी, तेजनारायण अधिकारी, सञ्जीवबहादुर कोइराला, देवका प्रहारी, पोखरा १६ का वडाध्यक्ष जीवनप्रसाद आचार्य, जिसस संयोजक बैनबहादुर अधिकारी क्षेत्री, हरिमाया गुरुङ, बलराम गायक र सुष्मा पौडेलले नाम दर्ता गरेका छन् ।

तर हालका मेयर मानबहादुर जिसी र उपमेयर मञ्जुदेवी गुरुङले आगामी कार्यकालका लागि कुनै पनि पदमा दावी गरेनन् । मेयर जिसी स्वास्थ्यका कारण पनि मेयरमा पुनः दावी गर्न सक्ने अवस्थामा छैनन् भने उपमेयर गुरुङको मेयरका लागि चर्चा चलिरहेको थियो । मेयर पदका आकांक्षीहरुले तीन हजार रुपैयाँ तिरेर मनोनयन दर्ता गराएका छन् । मेयरका लागि दुई पुरुष र एक महिलाको नाम पार्टी केन्द्रीय कमिटीमा सिफारिस हुनेछ ।