सर्लाही, २५ चैत । आर्थिक प्रगतिको ईष्या र डाहाका कारण छिमेकीले बालकलाई बन्धक बनाई हत्या गरेका छन् । मलंगवा–१२ गम्हरियाका दीपेन्द्र ठाकुरको ८ बर्षीय छोरा मिठुको हत्या उनकै छिमेकीले गरेको रहस्य खुलेको छ । छिमेकीले ती ८ बर्षीय बालकलाई अपहरण गरी हत्या गरेर शौचालयको सेप्टिक ट्यांकीमा बोरामा बेरेर लुकाएका थिए ।

हत्यामा संलग्न भएको भन्दै जगदीश ठाकुरसहित परिवारका सात जनालाई प्रहरीले नियन्त्रणमा लिएको छ । ठाकुरका परिवारले बालकलाई बन्धक बनाएर तीन दिनअघि नै घरको माथिल्लो तलाको दक्षिण कोठामा हत्या गरी बोराभित्र राखेर सेप्टिक ट्यांकीमा लुकाएको प्रहरीको भनाइ छ । प्रहरी प्रवक्ता प्रहरी नायब उपरीक्षक माधवप्रसाद बुढाथोकीले परिवारका सबै जना मिलेर हत्या गरेको हुन सक्ने बताउँदै घटनाको थप अनुसन्धान भइरहेको जानकारी दिएका छन् ।

आइतबारदेखि बेपत्ता दीपेन्द्र र महासुन्दरका ८ वर्षीय छोरा मिठु भनिने आकाशको शव छिमेकी जगदीश ठाकुरको सेप्टिक ट्यांकीमा फेला परेपछि परिवार शोकमा विक्षिप्त छ । आइतबार साँझ खाना खाएर बाहिरको दलानमा निस्किएका मिठु त्यसपछि सम्पर्कविहीन अवस्थामा थिए । परिवारले बेपत्ता भएको भन्दै प्रहरीलाई निवेदन दिएका थिए ।

प्रहरीले बालक वेपत्ता भएको घटनामा अनुसन्धान गर्दै जाँदा उनका छिमेकी जगदीशलाई नियन्त्रणमा लिएको थियो । उनले बालकको हत्या गरेर शौचालयको सेप्टिक ट्यांकीमा लुकाएको बयान दिएपछि प्रहरी टोली बिहानै घटनास्थल पुग्यो । ट्यांकीको ढकन खोल्दा बालकको शव बोरामा बाँधेर राखेको अवस्थामा फेला परेको थियो ।

छोरा बेपत्ताको जानकारी पाएपछि वैदेशिक रोजगारीमा बहराइनमा रहेका दीपेन्द्र दुई दिनअघि मात्र घर फिरेका थिए । उनका दुई छोरा र दुई छोरीमध्ये मिठु जेठा हुन् । वैदेशिक रोजगारीबाट आर्थिक, सामाजिक प्रगति गरेका दीपेन्द्रको परिवार सामान्य र सरल खालको रहेको स्थानीय शिक्षक लक्ष्मीनारायण चौधरीले बताए ।

उनका अनुसार दीपेन्द्रले पठाएको पैसाले घरघडेरीसहित आर्थिक प्रगति हासिल गरेका थिए । शिक्षक चौधरीले पैसाको लोभमा अथवा आर्थिक प्रगतिको ईर्ष्याले बालकको हत्या भएको हुन सक्ने बताए । ‘दीपेन्द्रका परिवार सामान्य र सरल स्वभावका छन्, कसैसँग रिसइबी भएको थाहा छैन,’ उनले भने । दीपेन्द्रले भने अज्ञात व्यक्तिको नामबाट मिठुका मामालाई १५ लाख फिरौतीको म्यासेज आएको जानकारी दिए ।  ‘मेरो परिवारले कहिल्यै कसैको कुभलो चिताएको छैन, मैले वैदेशिक रोजगारीमा गएर आर्थिक प्रगति गरें तर नातामा आफन्त पर्ने मेरो छिमेकीलाई असह्य भयो,’ गहभरि आँसु पार्दै दीपेन्द्रले भने ।