पोखरा, १६ चैत । स्कुटरलाई ट्रकले पोखराको सभागृह नजिकै आज ठक्कर दिदाँ एकजनाको मृत्यु भएको छ भने एकजना घाइते भएका छन् । आज विहान करिब ६ बजेको समयमा ना६ख ४७२५ नम्बरको ट्रकले ग१४प ६५९८ नम्बरको स्कुटरलाई ठक्कर दिएको थियो ।

ट्रकको ठक्करबाट स्कुटर चालक पोखरा महानगरपालिका–१५, नयाँगाउँ बस्ने १८ वर्षीया अन्जना पाईजाको मृत्यु भएको र पोखरा–१०, घलेचोक बस्ने १८ वर्षीया मिना गुरुङ घाइते भएको जिल्ला प्रहरी कार्यालय कास्कीले जानकारी दिएको छ । कास्की प्रहरीका प्रवक्ता एवं डीएसपी सुन्दर तिवारीका अनुसार अन्जनाको गण्डकी मेडिकल कलेजमा उपचारको क्रममा मृत्यु भएको हो ।

घाइते गुरुङको गण्डकी मेडिकल कलेजमा उपचार भइरहेको छ । उनको ढाडमा चोट लागेको भएपनि अवस्था सामान्य रहेको छ । घटना लगत्तै प्रहरीले ट्रक र ट्रक चालकलाई वडा प्रहरी कार्यालय बैदाममा राखेको छ ।