बेइजिङ । कोभिड–१९ को संक्रमण बढेपछि उत्तरी चीनको सियान सहरमा लकडाउन जारी गरिएको छ । अधिकारीहरूले १ करोड ३० लाखभन्दा बढी मानिसलाई घरमै बस्न निर्देशन दिएका छन् ।

चीनको सान्सी प्रान्तको सियान सहरमा बिहीबार कोभिड–१९ परीक्षणका लागि पर्खिरहेका स्थानीय । दुई साताको अवधिमा १ सय ४३ जनामा कोभिड संक्रमण पुष्टि भएपछि सरकारले लकडाउन गरेको हो ।

बुधबार घोषणा गरिएका प्रतिबन्धात्मक नियमहरूअनुसार प्रत्येक घरबाट एक जनाले २ दिनको एकपटक अत्यावश्यक सामग्री किन्न घरबाहिर जान पाउनेछन् । सान्सी प्रान्तमा पर्ने सियान सहरमा लाखौं मानिसमा भाइरसको परीक्षण गरिसकिएको छ ।

चीनले कोभिड–१९ को संक्रमण नियन्त्रणका लागि कडा रणनीति अख्तियार गर्दै आएको छ । त्यसअन्तर्गत ठूलो संख्यामा परीक्षण तथा र लकडाउनजस्ता उपाय अवलम्बन गर्ने गरिएको छ ।

सन् २०२२ को फेब्रुअरीमा चीनले ग्रीष्मकालीन ओलम्पिक्स आयोजना गर्दै छ । जसका कारण अहिलेदेखि नै उच्च सतर्कता अपनाइएको अधिकारीहरूको भनाइ छ ।

नयाँ नियमहरूअनुसार अब सियानका स्थानीयले विशेष परिस्थति र अधिकारीहरूको अनुमतिमा मात्र सहर छाडेर अन्यत्र जान पाउनेछैनन् । स्थानीय समयानुसार मध्यरातदेखि यो व्यवस्था कार्यान्वयनमा आएको हो । यस्तो नियम कहिलेसम्म रहन्छ भन्नेबारे भने केही उल्लेख नगरिएको बीबीसीले उल्लेख गरेको छ ।

सियानमा लामो दूरीका बस स्टेसनहरू बन्द भइसकेका छन् भने मुख्य मार्गहरूमा सुरक्षा जाँच केन्द्र राखिएका छन् । सियान विमानस्थलबाट हुने अधिकांश उडान स्थगित गरिएका छन् ।

सरकारी कर्मचारीलाई घरबाटै काम गर्ने व्यवस्था मिलाइएको छ भने अत्यावश्यकबाहेकका व्यवसायहरू बन्द गरिएको छ । अधिकारीहरूले गत सप्ताहन्तदेखि नै व्यायामशाला, मदिरालय र चलचित्रघरहरू बन्द गर्न लगाएका चीनको सरकारी अखबार ग्लोबल टाइम्सलाई उद्धृत गर्दै बीबीसीले जनाएको छ ।