पोखरा । गण्डकी प्रदेशमा कोरोना संक्रमणका कारण थप ४ जनाको मृत्यु भएको छ । हालसम्म मृत्यु हुनेको संख्या ६७ पुगेको स्वास्थ्य निर्देशनालय गण्डकी प्रदेश कार्यालयले जानकारी दिएको छ । आजमात्र प्रदेशमा थप नयाँ एकसय १ जना कोरोना संक्रमितहरु थपिएका छन् । कन्ट्रयाक्ट टे«सिङबाट सबै संक्रमितहरुको पहिचान खुलेको हो । कोरोना संक्रमितको संख्या अध्यावधिक विवरण अनुसार ६ हजार सातसय ११ पुगेको छ ।

यसरी मृत्यु हुनेहरुमा नवलपरासी (ब.सु.पू) जिल्ला, गैंडाकोट–५ का ७३ बर्षीय कोरोना संक्रमित पुरुषको हिजो चितवन मेडिकल कलेज, चितवनमा उपचारका क्रममा निधन भएको हो । कार्तिक ५ गते अस्पतालमा उपचारका लागि भर्ना गरिएको उनलाई कार्तिक ६ गते कोरोनाको संक्रमण पुष्टि भएको थियो ।

त्यसैगरी नवलपरासी (ब.सु.पू) जिल्ला, कावासोती–२ का ७७ बर्षीय कोरोना संक्रमित पुरुषको आज बिहान २ः३० बजे मध्यबिन्दु अस्पताल, नवलपरासी (ब.सु.पू)मा उपचारका क्रममा निधन भएको छ । उनलाई कार्तिक ३ गते कोरोना संक्रमणको पुष्टि भएको थियो ।

पोखरा महानगरपालिका वडा नं. १५ का ७८ बर्षीय कोरोना संक्रमित महिलाको हिजो राती ११ः०० बजे चरक मेमोरियल अस्पताल, पोखरामा उपचारका क्रममा निधन भएको हो । उनलाई कार्तिक ८ गते अस्पताल भर्ना गरिएको र सोही दिन कोरोना संक्रमण पुष्टि पनि भएको थियो ।

कोरोना संक्रमण कै कारण पोखरा महानगरपालिका वडा नं. ५ का ५५ बर्षीय कोरोना संक्रमित पुरुषको हिजो राती ९ः१० बजे पोखरा स्वास्थ्य बिज्ञान प्रतिष्ठान, पोखरामा आईसियुमा उपचारका क्रममा निधन भएको छ । उनलाई कार्तिक ६ गते कोरोना संक्रमण पुष्टि भएको थियो । उनीलाई कोभिड–१९, वाईल्याटरल निमोनिया तथा कार्डिओ पल्मोनरी एरेष्ट लगायतका समस्या देखिएको पोखरा स्वास्थ्य विज्ञान प्रतिष्ठान पोखराबाट प्राप्त प्रतिवेदनमा उल्लेख छ । सम्पूर्ण मृत्यु भएका व्यक्तिहरुको शव व्यवस्थापनको तयारी भईरहेको स्वास्थ्य निर्देशनालय गण्डकी प्रदेश कार्यालयले जानकारी दिएको छ ।