पोखरा । सुन भन्दै पहेँलो धातु देखाई ठगी गर्ने सातजनालाई प्रहरीले पक्राउ गरेको छ । विशेष सूचनाका आधारमा जिल्ला प्रहरी कार्यालय कास्कीले पहेँलो धातु बोकेर सुन भनी ठगी गर्न हिँडेको  ७ जनाको समूहलाई हिजो पक्राउ गरेको हो ।

पोखरा महानगरपालिका वडा नं. ८ सिर्जनाचोकस्थित पर्वत सुनचाँदी पसलमा कालिगढको रुपमा काम गर्ने भुवन विक समेतको यो समूहले ठगी गर्न हिडिरहेको अवस्थामा बुधबार दिउँसो ४ बजे पोखरा वडा नं. २ मिरुवाबाट नक्कली सुनसहित पक्राउ गरेको हो । मिरुवास्थित बिमला दमाईको कोठाबाट प्रहरीले सुन जस्तो देखिने पहँेलो धातु र विभिन्न कम्पनीको मोवाईल ७ थान बरामद समेत गरेको छ ।

यसरी पक्राउ पर्नेहरुमा म्याग्दी जिल्ला रघुगंगा गाउँपालिका वडा नं. ३ राखु घर भई हाल पोखरा वडा नं. २ मिरुवा बस्ने ४२ वर्षीया बिमला दमाई, रुपन्देही जिल्ला देबदह नगरपालिका वडा नं. ५ नमुनाटोल घर भई हाल पोखरा ५ फिर्केपुल बस्ने ३५ वर्षीय विशाल थापा मगर, कास्की अन्नपूर्ण गाउँपालिका वडा नं. ३ पाउदुर घर भई हाल पोखरा २ मिरुवा बस्ने ४४ वर्षीय गणेशबहादुर दर्जी र रामेछाप जिल्ला सुकाजोर नगरपालिका वडा नं. ७ वृता घर भई हाल पोखरा १० रामबजार बस्ने २३ वर्षीया अनिल भुजेल रहेका छन् ।

यसैगरी पक्राउ पर्नेहरुमा सर्लाही जिल्ला बागमती नगरपालिका वडा नं. १ डापडाँडा घर भई हाल पोखरा १० रामबजार बस्ने ४२ बर्षीय ईन्द्रबहादुर बलम पाकी, चितवन टाडी नगरपालिका वडा नं. २ घर भई हाल पोखरा ८ सिर्जनाचोक बस्ने ३४ बर्षीय भुवन विक र चितवन जिल्ला राप्ती नगरपालिका वडा नं. ९ घर भई हाल पोखरा १० रामबजारस्थित कृष्णमन्दिर नजिकै बस्ने ३५ बर्षीय प्रकाश परियार रहेका छन् ।

प्रहरीले बरामद गरेको ६५४ ग्राम पहेँलो धातु सुनचाँदी व्यवसायी संघ कास्कीमा परीक्षण गर्दा नक्कली भएको पत्ता लागेको थियो । नक्कली सुन बोकेर मानिसलाई झुक्याई बेचबिखन गर्ने उद्देश्य एवं षडयन्त्र गरेको भन्दै कास्की प्रहरीले मुलुकी अपराध संहिता २०७४ को परिच्छेद २१ अन्तर्गत ठगी, अपराधिक, विश्वासघात तथा अपराधिक लाभ (एक्सटर्सन) सम्बन्धी कसुरमा जिल्ला अदालतबाट १० दिनको म्याद थप गरी अनुसन्धान अगाडि बढाएको कास्की प्रहरीले जारी गरेको विज्ञप्तिमा उल्लेख छ ।