पोखरा । गण्डकी प्रदेशका मुख्यमन्त्री पृथ्वीसुव्वा गुरुङ विश्वासको मत पाउन असफल भएसँगै पदमुक्त भएका छन् । प्रदेश सभाको बैठकमा मुख्यमन्त्री गुरुङका पक्षमा सत्तापक्ष कैं २७ मत र विपक्षमा ३० मत प्राप्त भएको थियो । जसमा एक सांसद अनुपस्थित र अर्का एक तटस्थ रहेका छन् ।

प्रदेशसभाको सबभन्दा ठूलो दलको नेताका हैसियतमा २९ वैशाखमा मुख्मन्त्री नियुक्त भएका गुरुङले बिहीबार आज प्रदेशसभामा विश्वासको मत मागेका थिए । ६० सदस्यीय प्रदेश सभामा ५८ सांसदहरुको उपस्थिति रहेको थियो । मुख्यमन्त्री गुरुङका पक्षमा मतदान गर्ने भन्दै पार्टीमा विवादित बनेका राष्ट्रिय जनमोर्चाका सांसद कृष्ण थापाले उपस्थित भएर पनि तटस्थ रहे । युवा तथा खेलकुदमन्त्री रहेका राजीव गुरुङ(दीपक मनाङे) भने प्रदेशसभा बैठकमा नै अनुपस्थित रहे । अन्यत्र प्रदेशको जस्तो गण्डकीमा खनाल–नेपाल पक्षका सांसदले फ्लोर क्रस पनि गरेनन् । खनाल–नेपाल पक्षका इन्द्रलाल सापकोटाले विश्वासको पक्षमा नै मतदान गरेका थिए ।

विवादित जनमोर्चाका सांसद थापाले मुख्यमन्त्री गुरुङको पक्षमा मतदान गर्ने बताए पनि अन्तिम समयमा उनी तटस्थ बसे । किन मतदान गर्नुभएन त ? भन्ने जिज्ञासामा पार्टीले सत्ता पक्षलाई मतदान नगर्ने भन्यो त्यसैले गरिन भन्ने जवाफ दिएका छन् ।

कांग्रेसका १५, माओवादी केन्द्रका ११, राष्ट्रिय जनमोर्चाका २ र जनता समाजवादीका २ सांसदले मुख्यमन्त्री गुरुङको विपक्षमा मत दिएका थिए । ६० सदस्यीय प्रदेशसभामा सरकार बनाउनका लागि ३१ मतको आवश्यकता पर्दछ । विपक्षी गठबन्धनको तर्फबाट मुख्यमन्त्रीका दावेदार नेपाली कांग्रेस संसदीय दलका नेता कृष्णचन्द्र नेपाली पोखरेलले बहुमतका साथ नयाँ सरकार गठन बताए ।

१६८ को उपधारा ३ अनुसार नियुक्त मुख्यमन्त्री गुरुङ पदमुक्त भएसँगै १६८ को उपधारा ५ बमोजिम नयाँ सरकार गठनको बाटो खुलेको छ । अब प्रदेश प्रमुखले मुख्यमन्त्री नियुक्तिका लागि प्रदेशसभाको विश्वासको मत प्राप्त गर्ने आधार प्रस्तुत गर्न आह्वान गर्ने छिन् । विपक्षी गठबन्धनले नेपाली कांग्रेस संसदीय दलका नेता कृष्णचन्द्र नेपाली पोखरेलले मुख्यमन्त्रीमा दावी गर्ने तयारी गरेको छ ।

यता, युवा तथा खेलकुद मन्त्री राजीव गुरुङ उर्फ दीपक मनाङले कित्ता परिवर्तन गरेसँगै अल्पमतमा परेका विपक्षी गठबन्धनको नयाँ सरकार गठनका लागि चाहिने ३१ मत पुग्ने निश्चित भएको छ ।