काठमाडौँ । थाइल्यान्डको राजपरिवारले कोरोना संक्रमणको रोकथाम र नियन्त्रणका लागि नेपाललाई पठाएको स्वास्थ्य सामग्रीहरु आज आइपुगेको छ । थाइ एयर फोर्सको जहाजमार्फत् ती स्वास्थ्य सामग्रीहरु नेपाल आएको परराष्ट्र मन्त्रालयले जानकारी दिएको छ ।

नेपाललाई सहयोग आएको स्वास्थ्य सामग्रीहरुमा १० लाख थान सर्जिकल मास्क, व्यक्तिगत सुरक्षा साधन (पीपीई) गाउन ११ हजार ५२० थान, पीपीईको लेग कभर १० हजार जोर, पीपीई सर्जिकल क्याप १० हजार थान, ¥यापिड एन्टिजन युनिट २० हजार युनिट, फेसशिल्ड पाँच हजार, डिजिटल थर्मोमिटर एक हजार ५०० थान, फिङ्गर टिप्स पल्स अक्सिमिटर ६०० थान, अक्सिजन नाजल ३० थान, अक्सिजन कन्सन्ट्रेटर आठ थान लगायत छन् ।

स्वास्थ्य सामग्रीहरु नेपालका लागि थाइ राजदूत भोषिता भोरासाफले त्रिभुवन अन्तर्राष्ट्रिय विमानस्थलमा आयोजित एक कार्यक्रमबीच स्वास्थ्यमन्त्री हृदयेश त्रिपाठीलाई हस्तान्तरण गरेका छन् ।