काठमाडौँ । दोस्रोपटक पनि प्रतिनिधिसभा भङ्ग गर्दै चुनावको घोषणा गरेपछि आक्रोशित राजनीतिक दलका नेताहरुले पूर्वराजा ज्ञानेन्द्र शाहले झैं मध्यरातमा डकैती गरिएको आरोप लगाएका छन् । पूर्वमन्त्री तथा माओवादी केन्द्रका स्थायी कमिटि सदस्य वर्षमान पुनले ट्वीटरमा ट्वीट गर्दै यस्तो आरोप लगाएका हुन् ।

प्रधानमन्त्री खड्गप्रसाद ओलीले मध्यरातमा मन्त्रिपरिषद्को बैठक डाकेर प्रतिनिधिसभा विघटन र चुनावको घोषणा गर्न सिफारिस गरेका थिए । तत्कालै मध्यरातमा नैं राष्ट्रपति विद्यादेवी भण्डारीले संसद विघटन गर्दै चुनावको घोषणा गरेपछि विपक्षी राजनीतिक दलहरुले सामाजिक सञ्जालमार्फत् आक्रोश पोखिरहेका छन् ।

‘मध्यरातमा डकैती गरियो । ज्ञानेन्द्र शाहले पनि शुक्रबार र मध्यरात नै रोज्ने गर्थे ।’ नेता पुनले ट्वीटरमा लेखेका छन्–‘नेपालीले आफ्नो संविधान बनाएको मन नपराउने शक्तिको डिजाईनमा केपी ओली गोटी बने भने केपीको गोटी विद्या भण्डारी । संविधान च्यातियो । लोकतन्त्रमाथि प्रहार भयो र जनभावना कुल्चिने काम भयो । नगर्ने चुनावको घोषणा । भनिन्छ, अति भए खति हुन्छ ।’