“हरेकको घरपरिवार र जीवन त्रासमा रहेको बेलामा यी युवाहरुले जोखिम मोलेरै चालेको यो मानवीय सेवाको कदम उत्कृष्ट र प्रशंसनीय छ । सरकारले यो गरेन, त्यो भएन भन्नु भन्दा पनि जति सकिन्छ केही आर्थिक सहयोग उपलब्ध गराएर यो संकटको घडीमा जुट्नु तपाई हाम्रो पनि साझा कर्तव्य हो ।”

पोखरा । ‘लक डाउन’का कारण अत्यावश्यकका सेवा बाहेक अरु सबै बजार र पसलहरु बन्द छन् । कोरोना संक्रमणको अवस्था भयावह बन्दै गएपछि प्रशासनले कडाईका साथ निषेधाज्ञा जारी गरेको छ । यस्तो अवस्थामा मानिसलाई रोग र भोक दुवै समस्याले पिरोलिरहेको छ ।

एकातिर कोरोना संक्रमणका कारण अकालमा धेरै मानिसले मृत्युवरण गर्नुपरेको छ भने आफन्तहरु शोकमा छन् । मानिस मानिससँग नै डराई रहेको अवस्था छ । घरबाट बाहिर मानिस निस्कने आँट गर्न सकिरहेको छैन । आफैंलाई जोगाउनै मुस्किल परिरहेको बेलामा केही युवाहरु भने अरुको सहयोगमा चूनौंती मोल्दै जुटिरहेका छन् ।

पश्चिमाञ्चल क्षेत्रीय अस्पतालको कोभिड आइसोलेसन वार्डमा बाहिर बसेका कोभिड संक्रमितका कुरुवा तथा आफन्तहरु । तस्विर: रोजिना अधिकारी/डन न्यूज

प्रसङ्ग ‘तातो भात अभियान’को हो । लकडाउनका कारण पोखरा बजार पनि ठप्प छ । गाउँ–गाउँबाट मानिसहरु कोरोना संक्रमितको उपचारका लागि पोखराका विभिन्न अस्पतालहरुमा आईरहेका छन् । सरकारी हुन् वा निजी सबै अस्पतालहरु कोरोना संक्रमितका कारण भरिएका छन् ।

यस्तो अवस्थामा सरकारी अस्पतालहरुमा आफ्ना विरामी बोकेर आएका आफन्तहरुलाई केही राहत होस् भन्ने उद्देश्यले केही युवाहरुले अस्पतालमा नै पुगेर बिरामीका कुरुवालाई खाना खुवाउने अभियान शुरु गरेका छन् । जसलाई ती युवाहरुले ‘तातो भात अभियान’ नाम दिएका छन् ।

विवेकशील साझा पार्टी पोखरा महानगर समितीका संयोजक अजय श्रेष्ठको नेतृत्वमा युवाहरुले पहिलो चरणमा पश्चिमाञ्चल क्षेत्रीय अस्पतालको कोभिड आइसोलेसन वार्डमा भर्ना भएका संक्रमित, उनीहरुका कुरुवा र स्वास्थ्यकर्मीहरुलाई तातो खाना बोकेर सेवामा जुटिरहेका छन् ।

एकातिर टाढा–टाढा गाउँबाट ल्याईएका विरामीका आफन्त र कुरुवालाई लकडाउनका कारण सजिलै खाना खाने अवस्था छैन । अर्को तर्फ आर्थिक समस्याले पनि पिरोल्लिएकाहरुलाई यसले झन् ठुलो राहत दिने काम गरिरहेको छ । खान र बस्नको समस्यामा रुमल्लिएका धेरैलाई यो अभियानले राहत दिएको छ ।

पूर्ण सुरक्षित उपाय अपनाएर कोरोना संक्रमित, उनीहरुका कुरुवा र आईसोलेसन वार्डमा कार्यरत स्वास्थ्यकर्मीहरुलाई दैनिक दुईसय छाक खाना खुवाउने तयारी भईरहेको विवेकशील साझा पार्टीका पोखरा महानगर संयोजक अजय श्रेष्ठले बताए ।

‘स्वस्फूर्त रुपमा रकम उठाएर हामीले यो अभियान १० दिनका लागि भनेर शुरु गरेका छौं ।,’ संयोजक श्रेष्ठले भने–‘सहयोगी मनहरु जुट्दै गए र यस अभियानको खाँचो अझै बढ्दै गयो भने लकडाउन अवधिभर यसलाई सञ्चालन गर्ने सोंचमा हामी छौं ।’

लेकसाइडको गडफाडर पिज्जेरियाको भान्सामा खाना तयार पार्ने र प्याकिङ गर्ने काममा १५ जना युवाहरुको टिम खटिई रहेको छ । यतिबेला मानिस मानिस देखि डराई रहेको बेलामा र अन्य जनप्रतिनिधिहरु समेत मौंन रहेको अवस्थामा विवेकशील साझा पाटी पोखरा महानगर समितिले उदाहरणीय कार्यको प्रारम्भ गरेको छ ।

त्यसैगरी, विवेकशील साझा पार्टी महानगर सहसंयोजक विपना कुँवरले सरकारी अस्पतालसँगै गण्डकी मेडिकल कलेजमा पनि यो अभियान सञ्चालन गर्ने योजना रहेको बताईन् । गाउँ–गाउँबाट आएका विरामीहरुका लागि हाम्रो आर्थिक स्रोतले भेटेसम्म र सहयोगी मन जुटेसम्म यो सेवालाई निरन्तरता दिने उनले बताईन् ।

हरेकको घरपरिवार र जीवन त्रासमा रहेको बेलामा यी युवाहरुले जोखिम मोलेरै चालेको यो मानवीय सेवाको कदम उत्कृष्ट र प्रशंसनीय छ । सरकारले यो गरेन, त्यो भएन भन्नु भन्दा पनि जति सकिन्छ केही आर्थिक सहयोग उपलब्ध गराएर यो संकटको घडीमा जुट्नु तपाई हाम्रो पनि साझा कर्तव्य हो ।