पोखरा । अनेकन् तिकडम र दाउपेचका बिचमा गण्डकी प्रदेशको मुख्यमन्त्रीमा पुनः पृथ्वीसुब्बा गुरुङ नियुक्त भएका छन् । राष्ट्रिय जनमोर्चाका गण्डकी प्रदेशका दुई सांसदहरुले असहयोग गर्दा विपक्षी गठबन्धनको सरकार निर्माण हुन असफल भएको हो ।
जनमोर्चाका दुई सांसद कृष्ण थापा र खिमबिक्रम शाहीको असहयोगका कारण चार दलले मुख्यमन्त्रीमा पेश गरेको दावी नपुग्ने भन्दै प्रदेश प्रमुख सीता पौडेलले गुरुङलाई पुनः नियुक्त गरेकी हुन् । गुरुङ कोरोना संक्रमित भएर सरकारी निवासमा नै बसेपनि आज प्रदेश प्रमुख पौडेल समक्ष सपथ खाएका छन् ।
विपक्षी गठबन्धनको तर्फबाट कांग्रेस संसदीय दलका नेता कृष्णचन्द्र नेपाली पोखरेलको दावी भएपनि प्रदेशप्रमुख पौडेलले दावी नपुग्ने भन्दै सबैभन्दा ठूलो दलको नेताको रुपमा गुरुङलाई नियुक्त गरेकी हुन् ।
संविधानको धारा १६८ को उपधारा ३ अनुसार प्रदेशसभामा कुनै दलको एकल बहुमत नभएमा र दुई वा दुई भन्दा बढी दल मिलेर पनि बहुमत जुटाउन नसकेमा ठूलो दलको संसदीय दलको नेतालाई प्रदेश प्रमुखले मुख्यमन्त्री नियुक्त गर्न सक्ने व्यवस्था रहेको छ ।
प्रदेश सभामा एमालेका २७, कांग्रेसका १५, माओवादी केन्द्रका सभामुखसहित गरी १२, जनता समाजवादीका २, जनमोर्चाका ३ र स्वतन्त्र १ सांसद रहेका छन् । जनमोर्चाका तीनजना सांसद मध्ये २ जनाले विज्ञप्ति जारी गर्दै असहयोग गरेपछि मुख्यमन्त्रीमा गुरुङ नियुक्त हुन पुगेका हुन् ।
वैशाख २६ गते मुख्यमन्त्री पदबाट राजीनामा दिएपछि प्रदेश प्रमुख पौडेलले संविधानको धारा १६८ को उपधारा (२) बमोजिम सरकार गठनका लागि ३ दिनको समय तोकेकी थिईन् । सोही समय अनुसार आज विपक्षी गठबन्धनको बहुमत पुग्न नसकेको भन्दै पुनः गुरुङ मुख्यमन्त्रीमा नियुक्त भएका हुन् ।
जनमोर्चाका दुई सांसदहरु मध्ये कृष्ण थापाले कांग्रेसलाई समर्थन नगर्ने जुन कारण देखाए पनि आर्थिक प्रलोभनमा परी असहयोग गरेको भन्ने आरोप लागेको छ । त्यसैगरी, यस अघि अविश्वासको मतदान गर्ने दिन गायव भएका अर्का सांसद शाहीले भने आफूले विपक्षी गठबन्धनको सरकारलाई समर्थन गरेको भन्दै विज्ञप्ति जारी गरेका छन् ।
यस अघि शाहीलाई फर्जी कोरोना पोजेटिभको रिपोर्ट तयार पारेर दिउँसो १२ बजे एकाएक गायब पारिएको थियो । पछि संसद नै अनिश्चितकालका लागि रोकिए पछि पोखराको नागढुङ्गास्थित एमालेका कार्यकर्ताले सञ्चालन गरेको चरक अस्पतालमा आईसियुमा भर्ना गरिएको भन्दै सांसद शाहीको टिठ लाग्दो तस्विर सार्वजनिक गरिएको थियो । सांसद शाहीलाई कसैलाई पनि भेट्न नदिईएको र अस्पतालमा कडा सुरक्षा व्यवस्था मिलाईएको थियो ।