पोखरा । गण्डकी प्रदेश सरकारलाई राष्ट्रिय जनमोर्चाले दिएको समर्थन आज फिर्ता लिएको छ । यससँगै गण्डकी प्रदेशमा अब नयाँ सरकार गठनका लागि विपक्षीहरुलाई बाटो खुल्ला भएको छ ।

प्रदेशसभा सचिवालयमा जनमोर्चाले आफ्नो समर्थन फिर्ता लिएको पत्र आइतबार नै दर्ता गराएको हो । गण्डकीमा जनमोर्चाका तीन सांसद भएपनि सरकार बनाउने र ढाल्ने विषयमा भने निर्णायक शक्ति नै बन्न पुगेको छ ।

वैशाख १ गते जनमोर्चाको केन्द्रीय बैठकले गण्डकी र लुम्बिनी प्रदेशमा सरकारलाई दिएको समर्थन फिर्ता लिने निर्णय गरेपनि अहिलेसम्म सरकारलाई दिएको समर्थन फिर्ता लिएका थिएनन् । यस अघि गण्डकीमा मुख्यमन्त्री गुरुङमाथि अविश्वासको प्रस्तावमाथि मतदान हुने समयमा जनमोर्चाका सांसद खिमबिक्रम शाही गायब भएपछि संसद बैठक नै अनिश्चितकालका लागि रोकिएको थियो ।

तीन दिन भित्रमा सरकार गठनका लागि प्रदेश सभा प्रमुखको कार्यालयले आह्वान गरेको थियो । अविश्वासको प्रस्तावमाथि आज छलफल हुने कार्यसूची भएपनि मुख्यमन्त्री पृथ्वीसुब्बा गुरुङले आइतबार नै पदबाट राजीनामा दिएका थिए ।

६० सदस्यीय प्रदेश सभामा गण्डकी प्रदेशमा नयाँ सरकार बनाउन ३१ सांसदको हस्ताक्षर चाहिन्छ । कांग्रेस, माओवादी, जसपा गठबन्धन र एमालेको समान २८/२८ संख्या सांसद छन् । निर्णायक शक्तिमा रहेको जनमोर्चासँग ३ सांसद रहेका छन् ।