काठमाडौं । संसद विघटन गर्ने निर्णयसँगै सरकारबाट बाहिरिएको नेकपा माओवादी केन्द्रले बल्ल आज आएर सरकारलाई दिएको समर्थन फिर्ता लिएको छ । माओवादी केन्द्रले आज बुधबार विहान समर्थन फिर्ता लिएपछि प्रधानमन्त्री खड्गप्रसाद ओली नेतृत्वको वर्तमान सरकार अल्पमतमा परेका छ ।

माओवादी केन्द्रका प्रमुख सचेतक देव गुरुङले समर्थन फिर्ताको पत्र आज बुधबार बिहान संसद सचिवालयका सचिव गोपालनाथ योगीलाई बुझाएका छन् । ‘सरकार निरन्तर रहिरहँदा राष्ट्रियता, लोकतन्त्र र जनजीविकाका सवालहरुमा गम्भीर खतरा पैदा भएको छ,’ पत्र बुझाए पछि पत्रकारहरुसँग माओवादी केन्द्रका प्रमुख सचेतक गुरुङले भने–‘यस्तै भयो भने कालान्तरमा राष्ट्रिय स्वाधीनता कैं मुद्दा गम्भीर खतरा पर्न सक्छ । त्यसैले आजैका मितिदेखि लागू हुने गरी हामीले सरकारलाई दिएको समर्थन फिर्ता लिएका छौं ।’

‘नियमित अधिवेशन बोलाउनु पर्नेमा विश्वासको मत मात्रै लिने गरी विशेष अधिवेशन बोलाउनु पनि त्रुटिपूर्ण रहेको छ,’ माओवादी केन्द्रका प्रमुख सचेतक गुरुङले भने–‘यो पनि संविधान विपरीत कै कार्य हो ।’

नियमित अधिवेशन बोलाएर विधेयक ल्याउन सकिनेमा सरकारले त्यसो नगरी विभिन्न ७ वटा अध्यादेश जारी गरेको भन्दै माओवादी केन्द्रका प्रमुख सचेतक गुरुङले त्यसको पनि खुलेरै विरोध गरे । अल्मपतमा परेका प्रधानमन्त्री ओलीले यही वैशाख २७ गते संसदको विशेष अधिवेशनबाट विश्वासको मत लिँदैछन् । तत्काल कायम रहेको सदस्य संख्याको बहुमत नपुगे ओली सरकार ढल्नेछ ।