रुकुम । नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल ‘प्रचण्ड’ले जाली फटाहाबाट हेडक्वार्टर घेरिए जस्तो भएको स्वीकार गरेका छन् । रुकममा आयोजित सभालाई मंगलबार सम्बोधन गर्दै प्रचण्डले भने–‘गल्ती भयो । सोझासीधा, शहीद तथा घाइतेका परिवार ओझेलमा परे जस्तो, जाली फटाहाबाट हेडक्वार्टर घेरिए जस्तो भयो ।’

रुकुमेली जनताका सामु अध्यक्ष प्रचण्डले सम्बोधनका क्रममा आफूबाट गल्ती भएको भन्दै आत्मालोचना पनि गरेका छन् । दुःख कष्ट गरेका तथा नेतृत्वलाई बचाउने नेता कार्यकर्ता ओझेलमा परेको र जाली फटाहाहरुले महत्व पाएको प्रचण्डले स्वीकारेका हुन् ।

आफूले कहिल्यै देश र जनताको हितमा दायाँबायाँ नगरेको दावी गर्दै अध्यक्ष प्रचण्डले अब जनयुद्ध र जनआन्दोलनमा इमानदारी साथ लागेका नेता कार्यकर्तालाई अगाडि बढाउने प्रतिबद्धता समेत जनाएका छन् ।