काठमाडौं । भारतबाट हीरा ओसार्ने भरियाका रुपमा मुम्बई पु¥याएर कोठीमा दुई महिलालाई ३५ हजार रुपैयाँमा बेच्ने अभियुक्त २८ वर्षपछि पक्राउ परेका छन् । प्रहरी प्रधान कार्यालय मानव बेचविखन अनुसन्धान ब्यूरो बबरमहल काठमाडौंबाट खटिएको टोलीले रामशरण पण्डित क्षेत्रीलाई पक्राउ गरेको हो ।

भक्तपुर चाँगुनारायण नगरपालिका वडा नं. ८ जीतपुर बस्ने ६८ वर्षीय क्षेत्रीलाई प्रहरीले सोमबार (चैत ९ गते) लुकिछिपी बसेको अवस्थामा पक्राउ गरेको थियो । कामको सिलसिलामा काठमाडौंको बालाजु क्षेत्रमा आएका ती दुई महिलालाई क्षेत्रीले ट्याक्सीमा घुमाउन लैजाने भन्दै भारतको कोठीसम्म पु¥याएका थिए ।

विभिन्न व्यक्तिहरुसँग भेटघाट गराई भारतको महाराष्ट्रमा हीरा पाईन्छ, महिलाले लुकाई छिपाई नेपाल ल्याउँदा पक्राउ पर्दैन भनी भरियाका रुपमा केही आर्थिक प्रलोभनमा क्षेत्रीको समूहले ती महिलालाई फसाएका थिए । क्षेत्रीले बाटोमा लाग्ने सबै खर्च आफैँ व्यहोर्ने र हीरा सुरक्षित ल्याए वापत जनही ६ हजारका दरले ज्याला दिने आश्वासन ती महिलाहरुलाई दिएका थिए ।

निम्न आर्थिक अवस्था भएका दुई महिलाहरुलाई क्षेत्रीको गिरोहले २०४९ सालमा नै काठमाडौं कलंकीबाट वीरगंजको रक्सौल नाका हुँदै मुम्बई पुर्याइको प्रहरीको भनाई छ । क्षेत्रीले मुम्बई पु¥याएर ती महिलाहरुलाई कोठी संचालिकाहरुसँग भेट गराएका आफू एकैछिनमा फर्किने भन्दै त्यहाँबाट फरार भएका थिए ।

कोठीमा पु¥याईएका महिलाहरुले आफू बेचिएको ५ दिनपछि मात्र थाहा पाएका थिए । डर, त्रास, धम्की र यातना दिएर ती महिलाहरुलाई कोठी सञ्चालकले अनैतिक कृयाकलाप गर्न बाध्य पारेको जाहेरी पीडितहरुले दिएको प्रहरीले जानकारी दिएको छ ।

लामो समय पछी ती महिलाहरुलाई मुम्बई प्रहरीको सहयोगमा उद्दार भई नेपाल फर्किएका थिए । ती पीडित महिलाहरुले २०४९ साल भदौ १२ गते जिल्ला प्रशासन कार्यालय काठमाडौंमा क्षेत्रीका विरुद्धमा जाहेरी दिएका थिए । चेलीबेटी बेचबिखन गर्ने अभियुक्त क्षेत्री पटक–पटक गरी साउदी अरबमा १२ वर्ष रोजगारीका लागि गएका र त्यसपछि नेपालका विभिन्न ठाउँहरुमा लुकिछिपी बस्दै आएको प्रहरीले जानकारी दिएको छ ।