लमजुङ । जनयुद्धको आधारभूमि पूर्वी लमजुङको दुधपोखरी गाउँपालिकाको विचौर र ईलाम पोखरीमा प्रतिबन्धित नेपाल कम्युनिष्ट पार्टीले सहिद तथा वेपत्ता परिवारलाई सम्मान गरेको छ । सहिद सप्ताह कार्यक्रम सुरु गर्दै नेत्रविक्रम चन्द ‘विप्लव’ नेतृत्वको प्रतिबन्धित नेकपा लमजुङले सो सम्मान गरेको हो ।

फागुन १४ गते आजदेखि २१ गतेसम्म प्रतिबन्धित नेकपाले लमजुङका सम्पूर्ण सहिद तथा वेपत्ता परिवारसँग भेटघाट गर्ने कार्यक्रम रहेको जिल्ला ईञ्चार्ज आक्रोशले जानकारी दिनुभयो । सम्मान कार्यक्रममा बोल्दै लमजुङका ईञ्चार्ज आक्रोशले सहिदहरुको सपनालाई साकार पार्न एकीकृत जनक्रान्ति बाहेक अर्को विकल्प र पार्टी नभएको बताउनुभयो ।

जिल्ला पार्टी सदस्य एवम् अखिल नेपाल किसान महासंघका जिल्ला संयोजक हरिले छिट्टै दलाल संसदीय व्यवस्थाको अन्त्य हुने र जनगणतन्त्र स्थापना हुने कुरामा ढुक्क रहन सहिद, वेपत्ता तथा घाईते परिवारलाई आग्रह गर्नुभयो ।

त्यसैगरी, लमजुङ जिल्ला सेक्रेटरी गौरवले मध्यनेपाल नगरपालिकामा भेटघाट कार्यक्रम सम्पन्न गरी आमजनतामा बाँकी अधुरो क्रान्तिलाई लक्ष्यसम्म पु¥याउने जिम्मेवारी र एकमात्र शक्ति नेकपा भएको र एकीकृत जनक्रान्तिमार्फत् नै यो सफल हुने विश्वास पाएको बताउनुभयो ।

दुधपोखरी गाउँपालिकाका ईञ्चार्ज सानो भाइले युवा शक्ति एकीकृत जनक्रान्तिको अभिभारा पुरा गर्नका लागि एकजुट भएर उठ्नु पर्नेमा जोड दिनुभयो ।

प्रतिबन्धित नेकपाले लमजुङ जिल्लाका ८६ जना सहिद, घाईते तथा वेपत्ता परिवारलाई भेटघाट गर्ने र एकीकृत जनक्रान्तिलाई आमजनतामा बुझाउने अभियानमा सक्रिय रहेको जिल्ला ईञ्चार्ज आक्रोशले बताउनुभयो ।