काठमाडौं । प्रतिबन्धित नेपाल कम्युनिष्ट पार्टीका वरिष्ठ नेता धमेन्द्र बास्तोलालाई गैरकानुनी थुनाबाट मुक्त गर्न अदालतले बाध्यकारी आदेश दिए पनि प्रहरीले पुनः पक्राउ गरेको छ । सर्वोच्च अदालतको गेटबाट नै अमानवीय ढंगले पक्राउ गरिएका नेता बास्तोलालाई सोमबार बन्दी प्रत्यक्षीकरणको रिटमाथि सुनुवाई गर्दै न्यायाधीश मीरा खड्का र सुष्मालता माथेमाको इजलासले रिहा गर्न आदेश दिएको थियो ।

फरक विचार र आस्था राखेकै कारण चौंथोपटक काठमाडौं जिल्ला अदालत परिसरबाटै वरिष्ठ नेता बास्तोलालाई पक्राउ गरी सुनसरीमा थुनामा राखिएको थियो । नेता वास्तोलालाई हातहतियार खरखजाना तथा संगठित अपराध मुद्दामा पहिलोपटक ५ दिन र दोस्रो पटक ७ दिन म्याद थप गरी अनुसन्धानको लागि हिरासतमा राखिएको थियो ।

सर्वोच्च अदालतले वरिष्ठ नेता वास्तोलालाई विना आधार र कारण थुनामा राखेककोमा यसअघि पनि बन्दी प्रत्यक्षीकरण रिट जारी भएको र अहिलेसम्म थुनामा राखेको भन्दै असन्तुष्टि जनाएको छ । यही विषयमा उनलाई थुनामा राखे अवहेलनामा कारवाही चलाउने चेतावनी पनि दिइएको थियो । अदालतले अब पनि सोही विषयमा पक्राउ गरिएमा विपक्षीलाई नेपालको संविधान धारा १२८ (४) तथा न्याय प्रशासन ऐन, २०७३ को दफा १७ बमोजिम कारवाही हुने आदेशमा उल्लेख गरेको छ ।

अनिमा वास्तोला भण्डारीले दर्ता गराउनु भएको बन्दीप्रत्यक्षीकरण मुद्दामा वरिष्ठ अधिवक्ताहरु एकराज भण्डारी, चण्डेश्वर श्रेष्ठ, अधिवक्ताहरु शिवकुमार यादव, सन्तोष कोइराला, खिमानन्द अधिकारी, राजु अधिकारी, कविता बस्नेत, चुडाबहादुर निरौंला, लिलामणि पौडेल, प्रकाश महर्जनले बहस गर्नुभएको थियो । वरिष्ठ नेता बास्तोलालाई कहाँ राखिएको छ र कुन मुद्दामा पक्राउ गरिएको हो ? त्यसबारेमा अहिलेसम्म कुनै पनि जानकारी प्रहरीले दिएको छैन ।

सरकारले एकातर्फ प्रतिबन्धित पार्टी नेकपासँग वार्ता भईरहेको जानकारी दिए पनि वरिष्ठ नेतामाथि गरिएको यस्तो धरपडक र अमानवीय व्यवहारले राज्य जिम्मेवार र संवेदनशिल छैन भन्ने देखिएको छ । केही दिन अघि मात्र प्रतिबन्धित नेकपाका महासचिव नेत्रविक्रम चन्द ‘विप्लव’ले एक प्रेस विज्ञप्ति जारी गर्दै वार्ताका लागि सकारात्मक रहेको जानकारी दिएका थिए ।