काठमाडौं । नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिष्ट पार्टीका गण्डक ब्यूरो सदस्य निरु थापालाई प्रहरीले वेपत्ता बनाएको छ । सर्वोच्च अदालतले हिजो रिहा गर्ने आदेश दिएसँगै भित्रैबाट घेरा हाल्दै लगेर प्रहरीले गेट बाहिरबाट पुनः पक्राउ गरेको अधिवक्ता सन्तोष कोइरालाले जानकारी दिनुभयो । सर्वोच्च अदालत कैं आदेशको अवहेलना गर्दै यसरी अदालत भित्रैबाट पक्राउ गर्नु गलत कार्य भएको अधिवक्ता कोइरालाले बताउनुभयो ।

अहिलेसम्म पनि नेता निरु कुन अवस्थामा, कहाँ छन् ? भन्ने विषयमा प्रहरीले उनका परिवारजनलाई केही जानकारी दिएको छैन । सर्वोच्च अदालतका न्यायाधीशहरु प्रकाशमान सिंह राउत र टंकबहादुर मोक्तानको संयुक्त ईजलासले नेता निरुलाई म्याद थप गरेर थुनामा राख्नु पर्ने कुनै कारण नभएको भन्दै थुनामुक्त गर्न आदेश दिएको थियो ।

माघ ३ गते उपचारका लागि काठमाडौं पुगेका नेता निरुलाई टोखास्थित बाटोमा हिडिरहेको अवस्थामा प्रहरीले पक्राउ गरी अभद्र व्यवहारको मुद्दा लगाएको थियो । सो लगत्तै नेता निरुको रिहाईको लागि दिलमाया थापाले सर्वोच्च अदालतमा बन्दी प्रत्यक्षीकरणको रिट दर्ता गराउनु भएको थियो । सो रिटमा निवेदकका तर्फबाट वरिष्ठ अधिवक्ता एकराज भण्डारी, अधिवक्ताहरु कपिलचन्द्र पोखरेल, सन्तोष कोइराला र चुडाबहादुर निरौंलाले बहस गर्नुभएको थियो ।