News Portal

ताजा शिर्षकहरु

चर्चित शिर्षकहरु

अन्तर्राष्ट्रिय प्रमुख समाचार

‘चिनियाँ राजनीतिक टोली नेपाल आईपुग्यो’

'चिनिया टोली दुई चिरा भएका कम्युनिष्टलाई मिलाउन राष्ट्रपति सिको निर्देशनमा नेपाल आएका हुन्'

काठमाडौं । एयर चाईनाको जहाज चार्टर्ड गरेर चिनियाँ राजनीतिक टोलीे राष्ट्रपति सी चिनफिङको सन्देश बोकेर नेपाल आईपुगेको छ । चिनिया टोली दुई चिरा भएका कम्युनिष्टलाई मिलाउन राष्ट्रपति सिको निर्देशनमा नेपाल आएका हुन् । उक्त टोली बेइजिङबाट छङ्तु हुँदै आइतबार मध्यान्हतिर काठमाडौं उत्रिएको हो ।

नेपालमा राजनीतिक संकट चर्किदैं गएको बेला चिनियाँ कम्युनिष्ट पार्टीको अन्र्तराष्ट्रिय विभाग उपमन्त्री कुओ येचौको नेतृत्वमा ६ सदस्यीय टोली दिउँसो साढे १ बजे काठमाडौं आएको हो ।

काठमाडौं ओर्लिए लगत्तै चार सदस्यीय चिनियाँ टोली बालुवाटारस्थित आफ्नै दुतावासमा पुगेको छ । टोलीमा कम्युनिष्ट पार्टी अन्तर्राष्ट्रिय विभाग महानिर्देशक छुइ यान पनि सहभागी हुनुहुन्छ । प्रधानमन्त्री केपी शर्मा ओलीले प्रतिनिधिसभा विघटन गरेपछि बढ्दै गएको राजनीतिक संकटले चीनको ध्यानाकर्षण गराएको हो ।

नेपालमा रहेकी चिनियाँ राजदूत होउ यान्छीले पनि पहिलेदेखि नै नेकपामा उत्पन्न विवाद मिलाउन र पार्टी फुट्न नदिन पटक–पटक प्रयास गर्दै आईरहनु भएको थियो । राजदुत यान्छीले राष्ट्रपति, प्रधानमन्त्रीदेखि शीर्षस्थ नेताहरुलाई उनीहरु कैं निवासमा पुगेर समस्या समाधानका लागि पहल गर्दै आईरहनु भएको थियो ।

चिनियाँ टोलीको भ्रमणबारे विस्तृतमा जानकारी प्राप्त हुन नसके पनि स्रोतका अनुसार चिनियाँ दुतवासमा व्रिफिङ लिएर उनीहरु भेटघाटमा सक्रिय हुनेछन् । चार दिनसम्म उनीहरुले विभिन्न राजनीतिक भेटघाट गरेर स्वदेश फर्किने कार्यक्रम रहेको छ ।

नेपालमा रहँदा टोलीले राष्ट्रपति विद्यादेवी भण्डारी, प्रधानमन्त्री केपी शर्मा ओली, नेकपा अध्यक्षद्वय पुष्पकमल दाहाल र माधवकुमार नेपाललगायतसँग भेटवार्ता गर्ने छन् । टोलीले राजनीतिक नेतृत्व बाहेक सेनाका उच्चअधिकारीसँग पनि भेटभाट गर्ने कार्यक्रम रहेको छ ।

यसअघि पनि टोली ०७४ फागुनमा पनि नेपाल आएको थियो । त्यसको तीन महिनापछि तत्कालीन एमाले र तत्कालीन माओवादी केन्द्रबीच पार्टी एकीकरण भएको थियो । भारतले नोट गरेको जानकारी दिएपनि चीनले संसद विघटन र नेकपामा आएको फुटबारे औपचारिक प्रतिक्रिया अहिलेसम्म दिएको छैन ।

प्रतिक्रिया