पोखरा, ३ साउन । पोखरा बसपार्क क्षेत्रमा लामो समयदेखि बसोबास गर्दै आएका परिवारमध्ये अधिकांशको अन्यत्रै घरजग्गा रहेको तथ्य सार्वजनिक भएको छ । पोखरा महानगरपालिकाद्वारा गठित छानबिन समितिको प्रतिवेदनअनुसार बसपार्कको जग्गामा बसोबास गरिरहेकामध्ये २ सय २० परिवारको अन्यत्रै घरजग्गा रहेको पाइएको हो ।

महानगरपालिकाका सूचना अधिकारी एवं छानबिन समितिका संयोजक कृष्ण तिवारीका अनुसार बसपार्क क्षेत्रमा बसोबास गर्ने कुल परिवारमध्ये २ सय ९९ परिवार मात्र वास्तविक भूमिहीन सुकुम्वासीका रूपमा पहिचान भएका छन् । सुरुमा २ सय ३३ परिवारको अन्यत्र घरजग्गा रहेको भनिए पनि थप अध्ययनका क्रममा १३ परिवार सुकुम्वासी नै रहेको पुष्टि भएपछि अन्यत्र घरजग्गा हुनेको संख्या २ सय २० कायम भएको उनले जानकारी दिए ।

समितिको प्रतिवेदनअनुसार सुकुम्वासी, भूमिहीन वा अव्यवस्थित बसोबासीका नाममा निवेदन दिएका ५५ परिवारको हकमा भने फरक अवस्था देखिएको छ । निवेदन दिएका उनीहरूको बसपार्क क्षेत्रमा जग्गा वा पसल देखिए पनि फिल्डमा बसोबास नभएको पाइएको छ । कुल ५ सय ७४ जनाले निवेदन दिएकामा एक जनाको विवरणमा त्रुटि देखिएपछि ५ सय ७३ जनाको निवेदनमा छानबिन गरिएको थियो । अन्यत्र घरजग्गा देखिएका परिवारलाई के गर्ने भन्ने विषयमा भने अहिलेसम्म कुनै निर्णय भइसकेको छैन ।

महानगरपालिकाले सुकुम्वासीका रूपमा पहिचान भएका परिवारको व्यवस्थापनका लागि प्रक्रिया अगाडि बढाएको छ । वास्तविक सुकुम्वासीका लागि जग्गा पहिचान गर्न छुट्टै समिति गठन गरिएको छ भने उक्त समितिले सम्भावित सरकारी वा सार्वजनिक जग्गाको खोजी गरी महानगरलाई सिफारिससमेत गरिसकेको छ । पहिचान भएका सुकुम्वासीलाई जग्गा व्यवस्थापन गरेपछि वडा, महानगर हुँदै सुकुम्वासी समस्या समाधान आयोगको सिफारिसमा मालपोत कार्यालयमार्फत लालपुर्जा दिने प्रक्रिया अगाडि बढाइनेछ ।

पोखरा उपत्यका नगर विकास समितिको स्वामित्वमा रहेको बसपार्कको जग्गा २०३१ सालमा २ सय ५ रोपनी अधिग्रहण गरिएको थियो । विभिन्न समयमा जग्गा बिक्री, साटफेर र अतिक्रमणका कारण हाल सो जग्गा २६ रोपनीमा मात्र सीमित हुन पुगेको छ ।

यसैबीच, महानगरपालिकाले बसपार्क निर्माण प्रक्रियालाई तीव्रता दिएको छ । मेयर धनराज आचार्यका अनुसार महानगरले अहिलेसम्म बसपार्क क्षेत्रका ५ सय २० वटा अनधिकृत संरचनाहरू हटाइसकेको छ । छानबिन समितिको प्रतिवेदन सार्वजनिक गर्दै महानगरले सात दिनभित्र दाबी विरोध गर्न सम्बन्धित सबैलाई आह्वान गरेको छ । बसपार्कको जग्गामा भएको भनिएको चलखेलको अनुसन्धान गर्न पूर्व न्यायाधीश शंकर बरालको संयोजकत्वमा छुट्टै समिति गठन गरी छानबिन प्रक्रियासमेत अघि बढाइएको महानगरपालिकाले जनाएको छ ।