स्याङ्जा, ३२ असार । स्याङ्जामा ठूलो परिमाणमा नियन्त्रित लागूऔषधसहित दुई जना पक्राउ परेका छन् । जिल्ला प्रहरी कार्यालय स्याङ्जाका अनुसार, बुटवलबाट गल्याङतर्फ आउँदै गरेको यात्रुवाहक बसमा सवार दुई व्यक्तिलाई अवैध लागूऔषधसहित नियन्त्रणमा लिइएको हो ।

गत असार ३२ गते राति अन्दाजी १२ः३० बजेको समयमा गल्याङ नगरपालिका–१ राम्दीस्थित सिद्धार्थ राजमार्गमा प्रहरी चौकी राम्दीबाट खटिएको विशेष चेकजाँच टोलीले ’ग २ ख १९५२’ नम्बरको बस रोकी खानतलासी गर्दा उक्त लागूऔषध फेला परेको थियो । प्रहरी सहायक निरीक्षक रोशनलाल पाण्डेको कमाण्डमा खटिएको टोलीले जाँचका क्रममा पोखरा महानगरपालिका–५ का ४० वर्षीय नरेन्द्र आचार्य र सोही स्थानका ३४ वर्षीय सुरज प्याकुरेललाई पक्राउ गरेको हो ।

उनीहरूको साथबाट प्रहरीले ’ब्युप्रेनोर्फिन’ ३१ एम्पुल, ’फेनारगन’ ३० एम्पुल, ’डाइजेपाम’ २९ एम्पुलका साथै एक थान सिरिन्ज र दुई थान मोबाइल बरामद गरेको छ ।

लागूऔषधसहित पक्राउ परेका दुवै जनालाई जिल्ला प्रहरी कार्यालय स्याङ्जाले नियन्त्रणमा लिई थप अनुसन्धान अघि बढाएको छ । जिल्ला प्रहरी कार्यालयका अनुसार, घटनाको अनुसन्धानका लागि जिल्ला अदालत स्याङ्जाबाट सात दिनको म्याद थप गरी कानुनी प्रक्रिया अगाडि बढाइएको छ ।