काठमाडौं, ३२ असार । विशेष अदालतले नेपाल टेलिकमका पूर्वप्रबन्ध निर्देशक सुनिल पौडेललाई अकुत सम्पत्ति आर्जनको मुद्दामा साढे ८ वर्ष कैद र भारी जरिवानाको फैसला सुनाएको छ। न्यायाधीशहरू सुदर्शनदेव भट्ट, हेमन्त रावल र डिल्लीरत्न श्रेष्ठको इजलासले अकुत सम्पत्ति आर्जनमा ८ वर्ष र सार्वजनिक पदको दुरुपयोग गरेको अभियोगमा थप ६ महिना कैद सजाय निर्धारण गरेको हो।

अदालतले पौडेललाई १ करोड ५४ लाख २५ हजार २ सय रुपैयाँ जरिवाना भराउने फैसला गरेको छ। साथै, अपराध पीडित संरक्षण ऐन, २०७५ को दफा ४१ (३) बमोजिम थप ६ लाख १७ हजार रुपैयाँ पीडित राहत कोषमा जम्मा गर्नुपर्ने ठहर पनि गरेको छ। सोही मुद्दामा पौडेलको गैरकानुनी सम्पत्ति लुकाउन सहयोग गरेको आरोपमा दीपक आनन्दलाई पनि समान सजाय र जरिवाना सुनाइएको छ।

यसअघि मंगलबार मात्रै विशेष अदालतले पौडेललाई भ्रष्टाचारको अर्को मुद्दामा साढे १५ करोड बिगो कायम गर्दै साढे २ वर्ष कैदको फैसला सुनाएको थियो। उक्त घुस प्रकरणमा उनलाई १२ करोड ७५ लाख ७० हजार रुपैयाँ बिगो र सोही बराबरको जरिवानाका साथै ५१ लाख रुपैयाँ पीडित राहत कोषमा जम्मा गर्न आदेश दिइएको थियो।

अख्तियार दुरुपयोग अनुसन्धान आयोगको अनुसन्धान र सिंगापुरस्थित बैंक खाताको विवरणले पौडेलले लामो समयदेखि गैरकानुनी रूपमा विदेशी मुद्राको कारोबार गर्दै आएको पुष्टि गरेको थियो। फरेन्सिक प्रतिवेदन र सिंगापुरका आधिकारिक निकायबाट प्राप्त कागजातका आधारमा उनको खातामा १३ करोड ५३ लाख रुपैयाँ बराबरको विदेशी रकम फेला परेको थियो। राष्ट्रिय सूचना प्रविधि केन्द्रका पूर्वप्रमुख समेत रहेका पौडेलले कुल १४ करोड ९७ लाख रुपैयाँ अवैध रूपमा आर्जन गरेको अदालतको ठहर छ।