स्याङ्जा, ३२ असार । स्याङ्जाको गल्याङ नगरपालिका–६, बनपालेमा बिहीबार (आज) बिहान पहिरोमा पुरिएर एक जनाको मृत्यु भएको छ ।

बिहान अन्दाजी ५ः०० बजेको समयमा गल्याङ–६ का ६५ वर्षीय धनबहादुर थापाको गोठमाथिबाट पहिरो खस्दा उक्त घटना भएको हो । ढुङ्गा, माटोले बनेको र खरले छाएको एक तले कच्ची गोठमा काम गरिरहेको अवस्थामा पहिरो खस्दा उनी गोठसहित पुरिएका थिए।

घटनाको खबर प्राप्त हुनासाथ प्रहरी चौकी पिडीखोला, स्याङ्जाबाट प्रहरी सहायक निरीक्षक पदमबहादुर थापाको कमाण्डमा प्रहरी टोली घटनास्थलमा खटिएको थियो । प्रहरी टोली बिहान ६ः४५ बजे घटनास्थल पुगी स्थानीयवासीको सहयोगमा पहिरो हटाउँदा थापालाई मृत अवस्थामा फेला पारेको हो।

पहिरोका कारण गोठमा रहेका चौपायामा पनि क्षति पुगेको छ । सोही गोठमा रहेको एउटा भैंसीको मृत्यु भएको छ भने एउटा बङ्गुर घाइते भएको प्रहरीले जनाएको छ। यस घटनाबारे थप अनुसन्धान तथा अन्य विवरण बुझ्ने कार्य भइरहेको छ।