काठमाडौं, ११ वैशाख । अन्ततः ’स्वार्थको टकराव’ (Conflict of Interest) का बीच सम्पत्ति शुद्धीकरण अनुसन्धान विभागका महानिर्देशक गजेन्द्र ठाकुरको बहिर्गमन भएको छ। हिमालयन रि–इन्स्योरेन्समा श्रीमतीको नाममा सेयर रहेको र सोही कम्पनीका सञ्चालकहरूमाथि विभागले अनुसन्धान गरिरहेको तथ्य खुलेपछि सरकारले ठाकुरलाई बिहीबार अर्थ मन्त्रालय तानेको हो।

सम्पत्ति शुद्धीकरण जस्तो संवेदनशील निकायको नेतृत्व सम्हालिरहेका ठाकुरमाथि तब प्रश्न उठ्यो, जब उनकै श्रीमती राखी निहारिका ठाकुरको नाममा ’हिमालयन रि’ मा २० हजार कित्ता सेयर रहेको फेला पर्यो। विडम्बना त के छ भने, २०७८ सालमा सोही कम्पनीले सञ्चालन अनुमति पाउँदा ठाकुर नै विभागको प्रमुख थिए।

अहिले विभागले सोही कम्पनीका सञ्चालकहरूमाथि अकुत सम्पत्ति आर्जनको आशंकामा अनुसन्धान गरिरहेको छ। श्रीमती लगानीकर्ता रहेको कम्पनी र त्यसका सञ्चालकहरूमाथि ठाकुरले निष्पक्ष छानबिन गर्नेमा नैतिक संकट देखिएपछि उनलाई मन्त्रालय फिर्ता बोलाइएको स्रोतले जनाएको छ।

हिमालयन रि–इन्स्योरेन्समा ठाकुर मात्र एक्ला पात्र होइनन्। शक्तिको आडमा नेपालका थुप्रै उच्चपदस्थ कर्मचारीहरूले प्रत्यक्ष वा अप्रत्यक्ष रूपमा यो कम्पनीमा लगानी गरेको आशंका गरिएको छ। कसैले आफ्नै नाममा त कसैले परिवारका सदस्यलाई ’फ्रन्ट’ खडा गरेर सेयर सुरक्षित गरेको तथ्यहरू बिस्तारै बाहिर आउन थालेका छन्।

यो प्रकरणले तब उग्र रूप लियो जब सम्पत्ति शुद्धीकरण सम्बन्धी कसुरमा चैत १९ गते कुख्यात विचौंलिया दीपक भट्ट पक्राउ परे। भट्टको गिरफ्तारीसँगै नेपालका कहलिएका व्यापारिक घराना ‘शंकर ग्रुप’ का शाहिल अग्रवाल र सुलभ अग्रवाल हुँदैं शेखर गोल्छासम्म अनुसन्धानको घेरामा तानिएका छन्।

अनुसन्धानको दायरा फराकिलो हुँदै जाँदा नेपालको पुँजी बजारमा दबदबा राख्ने अन्य व्यवसायीहरूको समेत पोल खुल्न थालेको छ। आफ्नै महानिर्देशक तानिएपछि अब विभागमा आउने नयाँ नेतृत्वले यो ‘हाई–प्रोफाइल’ अनुसन्धानलाई कसरी अगाडि बढाउँछ भन्नेमा सबैको चासो केन्द्रित भएको छ।