काठमाडौं, १५ चैत । जिल्ला अदालत काठमाडौंले नेकपा एमालेका अध्यक्ष तथा पूर्वप्रधानमन्त्री केपी शर्मा ओली र नेपाली कांग्रेसका नेता तथा पूर्वगृहमन्त्री रमेश लेखकलाई पाँच दिनको हिरासतमा राखेर अनुसन्धान गर्न अनुमति दिएको छ ।

आइतबार न्यायाधीश आनन्दप्रसाद श्रेष्ठको इजलासले बयान बाँकी रहेको आधारमा उनीहरूलाई प्रहरी हिरासतमा राख्न म्याद थप गरेको हो । सरकारी वकिलको कार्यालयले यसअघि १० दिनको हिरासत माग गरेको थियो ।

गत वर्ष भदौ २३ र २४ गते भएको ‘जेनजी आन्दोलन’को क्रममा भएको दमनमा जिम्मेवार रहेको भन्दै गठित जाँचबुझ आयोगले ओली र लेखकविरुद्ध फौजदारी मुद्दा चलाउन सिफारिस गरेको थियो । आयोगको प्रतिवेदनका आधारमा वर्तमान सरकारले शनिबार बिहान उनीहरूलाई पक्राउ गरेको थियो ।

पक्राउपछि आज अदालतमा उपस्थित गराइएका लेखक स्वयं उपस्थित भएका थिए भने ओली बिरामी भएका कारण त्रिभुवन विश्वविद्यालय शिक्षण अस्पतालबाट भर्चुअल माध्यमबाट जोडिएका थिए ।

म्याद थपपछि लेखकलाई काठमाडौंको महाराजगञ्जस्थित नेपाल प्रहरीको २ नम्बर गणमा राखेर अनुसन्धान अघि बढाइने भएको छ । जिल्ला प्रहरी परिसर काठमाडौंका एसएसपी रमेश थापाले भने, ‘उहाँलाई २ नम्बर गणमै राखेर अनुसन्धानको काम गरिनेछ ।’ उच्च सुरक्षा र व्यवस्थापनका कारण लेखकलाई परिसरको सामान्य हिरासतमा नराखी गणमा राखिएको प्रहरीले जनाएको छ ।

यसैबीच, ओलीलाई भने स्वास्थ्य अवस्थालाई ध्यानमा राख्दै त्रिभुवन विश्वविद्यालय शिक्षण अस्पतालमै राखिने भएको छ । अदालतको आदेशमा पनि उनीको उपचारको प्रबन्ध मिलाउन निर्देशन दिइएको छ ।

जेनजी आन्दोलनका क्रममा भएको दमन र हिंसात्मक घटनामा ज्यानसम्बन्धी कसुरमा अनुसन्धान गर्न पूर्वन्यायाधीश गौरीबहादुर कार्कीको नेतृत्वमा गठित आयोगले ओली र लेखकलाई दोषी ठहर गर्दै मुद्दा अघि बढाउन सिफारिस गरेको थियो । उक्त सिफारिसलाई मन्त्रिपरिषद्ले शुक्रबार कार्यान्वयन गर्ने निर्णय गरेसँगै पक्राउ प्रक्रिया अघि बढेको थियो ।