काठमाडौं, १४ चैत । सरकारले गत भदौ २३ र २४ गते भएको जेनजी आन्दोलनका घटनाबारे छानबिन गर्न गठित जाँचबुझ आयोगका अध्यक्ष गौरीबहादुर कार्कीको सुरक्षा व्यवस्था कडा बनाएको छ।

आयोगको सिफारिसअनुसार तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई शनिबार प्रहरीले पक्राउ गरेपछि उत्पन्न हुन सक्ने सुरक्षा जोखिमलाई ध्यानमा राखेर यो कदम चालिएको हो। कार्कीको निवास रहेको भक्तपुरको गुण्डु क्षेत्रमा बाक्लो संख्यामा सुरक्षाकर्मी खटाइएको छ।

प्रहरीका अनुसार, आयोगको सिफारिस कार्यान्वयन भएपछि एमालेका नेता तथा कार्यकर्ताहरूले कार्कीविरुद्ध आक्रोशपूर्ण अभिव्यक्ति दिइरहेका छन्। त्यसैले थप सुरक्षा चुनौती बढेको देखिन्छ। सरकारले कार्कीलाई अझ सुरक्षित स्थानमा सार्ने तयारी पनि गरेको बताइएको छ।

ओली र लेखकको पक्राउको विरोधमा एमाले कार्यकर्ताहरूले शनिबार काठमाडौंका माइतीघर, बबरमहल र सिंहदरबार आसपास प्रदर्शन गरेका थिए। यसले गर्दा उक्त क्षेत्रहरू तनावपूर्ण बनेका थिए। आयोगको प्रतिवेदन कार्यान्वयन सुरु भएलगत्तै एमालेले देशका विभिन्न शहरमा विरोध प्रदर्शन गरिरहेको छ।

उपत्यका प्रहरीका एक अधिकृतले कार्कीको घर गुण्डुमै रहेको र ओली पनि सोही क्षेत्रबाट पक्राउ परेको बताएका छन्। एमालेतर्फबाट आउने अभिव्यक्तिका कारण सतर्कता अपनाउनुपरेको उनको भनाइ छ।