सिन्धुपाल्चोक, २४ फागुन । सिन्धुपाल्चोक क्षेत्र नं. २ बाट नेपाली कम्युनिस्ट पार्टी (नेकपा)का युवराज दुलाल प्रतिनिधिसभा सदस्यमा निर्वाचित भएका छन्।

उनले २१ हजार ५७२ मत प्राप्त गर्दै निकटतम प्रतिस्पर्धी नेपाली कांग्रेसका बंशलाल तामाङलाई पराजित गरेका हुन्। तामाङले १८ हजार ८४८ मत ल्याएका थिए, जसले गर्दा दुलालले करिब २ हजार ७२४ मतको अन्तरले जित हासिल गरे।

तेस्रो स्थानमा नेकपा (एमाले) का शेरबहादुर तामाङ १५ हजार ५१४ मतसहित रहे भने चौथो स्थानमा राष्ट्रिय स्वतन्त्र पार्टी (रास्वपा) का अजय श्रेष्ठले १३ हजार ९१७ मत प्राप्त गरे।

यो क्षेत्रमा विगतका निर्वाचन इतिहास हेर्दा २०४८ देखि २०५६ सम्म राष्ट्रिय प्रजातन्त्र पार्टी (राप्रपा) का पशुपति शमशेर राणाले लगातार जित हासिल गरेका थिए। २०६४ मा तत्कालीन नेकपा (माओवादी) का दावा तामाङ विजयी भएका थिए। त्यसपछि २०७० र २०७४ मा एमालेका शेरबहादुर तामाङले जितेका थिए भने २०७९ मा नेपाली कांग्रेसका मोहन बस्नेत निर्वाचित भएका थिए।

नवनिर्वाचित सांसद युवराज दुलाल यसअघि बागमती प्रदेश सरकारमा मन्त्रीको जिम्मेवारी सम्हालिसकेका अनुभवी नेता हुन्। उनी प्रदेशसभामा दुई पटक निर्वाचित भइसकेका थिए र सो पदबाट राजीनामा दिएर यसपटक प्रतिनिधिसभा निर्वाचनमा होमिएका थिए।