स्याङ्जा, २३ फागुन । स्याङ्जा क्षेत्र नम्बर १ मा राष्ट्रिय स्वतन्त्र पार्टी (रास्वपा)का उम्मेदवार धनञ्जय रेग्मी प्रतिनिधिसभा निर्वाचनमा विजयी भएका छन्।

उनले निकटतम प्रतिस्पर्धीलाई १० हजार २१४ मतको ठूलो अन्तरले पछि पार्दै यो जित हासिल गरेका हुन्। निर्वाचन आयोगको तथ्यांकअनुसार रेग्मीले कुल २९ हजार ७१ मत प्राप्त गरे।

उनका मुख्य प्रतिद्वन्द्वी नेपाली कांग्रेसका भरतराज ढकाल ले १८ हजार ८५७ मत ल्याएर दोस्रो स्थानमा रहे। यस्तै, नेकपा (एमाले)का मीनप्रसाद गुरुङ ले १६ हजार ८०४ मत प्राप्त गरी तेस्रो भए भने नेपाली कम्युनिस्ट पार्टीका शैलेन्द्र घिमिरे ले १ हजार ५५२ मत सहित चौथो स्थानमा चित्त बुझे।

रेग्मी यसअघि पर्यटन तथा जलवायु परिवर्तन क्षेत्रमा सक्रिय थिए। जापानबाट पीएचडी गरेका उनी विगतमा त्रिभुवन विश्वविद्यालयमा पनि अध्यापन गरिसकेका छन्। निर्वाचन अभियानका क्रममा उनी पछिल्लो ६ महिनादेखि रास्वपामा सक्रिय राजनीतिमा लागेका थिए र स्याङ्जाका गाउँगाउँमा पुगेर जनताका समस्या सुनेर चुनावी मैदानमा उत्रिएका थिए।

यो क्षेत्रमा कुल १ लाख ३० हजार ८८६ मतदाता थिए। जसमध्ये ७० हजार ९४४ मत खसेको थियो। खसेका मतमध्ये २ हजार ९०८ मत बदर भएको निर्वाचन कार्यालयले जनाएको छ।

यहाँ ११ वटा दलका उम्मेदवार र एक स्वतन्त्रसहित कुल १२ जना प्रतिस्पर्धामा उत्रिएका थिए। रेग्मीको यो जितले स्याङ्जा–१ मा नयाँ राजनीतिक शक्तिको उदयलाई संकेत गरेको छ।