पोखरा, पुस २४ । राष्ट्रिय सभा सदस्य निर्वाचनअन्तर्गत उम्मेदवारहरूको मनोनयन दर्ता सकिएसँगै निर्वाचन आयोगले आज (पुस २५) उम्मेदवारहरूको विरोधमा उजुरी दिन सकिने कार्यतालिका सार्वजनिक गरेको छ। आयोगको स्वीकृत कार्यक्रमअनुसार बुधबार सातवटै प्रदेशका निर्वाचन अधिकृतको कार्यालयमा उम्मेदवारी दर्ता भएको थियो।

कार्यक्रमअनुसार पुस २५ र २६ गते मनोनयनपत्र र उजुरीमाथि जाँचबुझ गरी नामावली प्रकाशन गरिनेछ। पुस २७ गते उम्मेदवारले नाम फिर्ता लिन सक्नेछन् र अन्तिम नामावली प्रकाशित हुनेछ भने पुस २८ गते उम्मेदवारहरूलाई निर्वाचन चिह्न प्रदान गरिनेछ। आगामी माघ ११ गते बिहान ९ बजेदेखि दिउँसो ३ बजेसम्म मतदान हुनेछ।

आगामी माघ ११ गते हुने राष्ट्रिय सभा सदस्य निर्वाचनका लागि नेपाली कांग्रेस र नेकपा (एमाले) बीच गठबन्धन कायम रहे पनि नेपाली कम्युनिस्ट पार्टी (नेकपा) र जनता समाजवादी पार्टी (जसपा) नेपाल भने भागबन्डाको कुरा नमिलेपछि अलग्गिएका छन्। यी दुई दलले छुट्टाछुट्टै रूपमा उम्मेदवारी दर्ता गरेका छन्।

कांग्रेस र एमालेले सुरुमा नेकपालाई ३ सिट र जसपा नेपाललाई १ सिट दिने प्रस्ताव राखेका थिए। तर नेकपाले ४ सिटको दाबी गर्दा र जसपाले पनि १ सिटमा चित्त नबुझाउँदा गठबन्धनमा उनीहरू अटाउन सकेनन्। नेकपा र जसपा अलग भएपछि कांग्रेसले ९ सिट, एमालेले ८ सिट र लोकतान्त्रिक समाजवादी पार्टी (लोसपा) ले १ सिट भाग लगाएका छन्। कांग्रेसका प्रचार विभाग प्रमुख मीनबहादुर विश्वकर्माका अनुसार नेकपा र जसपासँगको गठबन्धन सम्भव भएन।

नेकपा भने एक्लै चुनावी मैदानमा उत्रिएको छ। पार्टीले १८ रिक्त सिटमध्ये १७ मा उम्मेदवारी दर्ता गरेको छ। गण्डकी प्रदेशबाट महिला क्लस्टरमा सशस्त्र द्वन्द्वकी घाइते गोमा घिमिरेलाई नेकपाले उम्मेदवार बनाएको छ। लमजुङकी ४० वर्षीया घिमिरे (गोमा लुइँटेल घिमिरे वा गोमा घिमिरे रुची) बेनी आक्रमणमा सेनासँगको भिडन्तमा घाइते भई एउटा खुट्टा गुमाएकी थिइन्।

तत्कालीन माओवादी खुला राजनीतिमा आएपछि उनी पत्रकारितामा लागेकी थिइन् र पछिल्लो समय पोखरा महानगरपालिकामा करार कर्मचारीको रूपमा कार्यरत थिइन्। करार कटौतीपछि स्वयंसेवामा सक्रिय रहेकी घिमिरेसँगै अन्य क्लस्टरमा मनाङका कपिल लामाले नेकपाबाट उम्मेदवारी दर्ता गराएका छन्।

गण्डकी प्रदेशबाट महिला र अन्य क्लस्टरमा गरी ६ जनाको मनोनयन दर्ता भएको छ। कांग्रेस–एमाले गठबन्धनबाट महिला क्लस्टरमा एमालेकी गोरखाकी सम्झना देवकोटा र अन्य क्लस्टरमा कांग्रेसका तनहुँका जगत तिमिल्सिना उम्मेदवार छन्। देवकोटा यसअघि विभिन्न तहका निर्वाचनमा हार व्यहोरेकी नेतृ हुन् तर यसपटक गठबन्धनको बलमा जित पक्का जस्तै देखिन्छ। तिमिल्सिना प्राध्यापक संघका पूर्व केन्द्रीय अध्यक्ष पनि हुन्।

यसैगरी राष्ट्रिय जनमोर्चाबाट महिला क्लस्टरमा बागलुङकी लक्ष्मी बास्कोटा र अन्यमा पोखराका शंकरप्रसाद बरालले उम्मेदवारी दिएका छन्। मनोनयन दर्ता बिहान १० बजेदेखि दिउँसो ३ बजेसम्म चलेको थियो र गठबन्धनका उम्मेदवारहरूलाई कार्यकर्ताले अग्रिम बधाई दिँदै शुभकामना व्यक्त गरेका थिए।

गण्डकीबाट यसअघि राष्ट्रिय सभामा निर्वाचित नेकपा नेता नारायणकाजी श्रेष्ठ र एमालेकी भगवती न्यौपानेको कार्यकाल सकिएकाले यो निर्वाचन हुन लागेको हो। प्रदेशमा ६० सदस्यीय प्रदेश सभा र ८५ पालिकामा कांग्रेस र एमालेको मतभार बलियो छ।

देशभरि राष्ट्रिय सभा निर्वाचनका लागि ४४ जनाको उम्मेदवारी दर्ता भएको निर्वाचन आयोगका प्रवक्ता नारायणप्रसाद भट्टराईले जानकारी दिए। सातै प्रदेशमा शान्तिपूर्ण रूपमा मनोनयन सम्पन्न भएको छ। कोशीबाट ५, मधेसबाट ११, बागमतीबाट ६, गण्डकीबाट ६, लुम्बिनीबाट ८, कर्णालीबाट ४ र सुदूरपश्चिमबाट ४ जनाको उम्मेदवारी परेको छ।

राष्ट्रिय जनमोर्चाले लुम्बिनी र गण्डकीबाट २/२ गरी ४ उम्मेदवार उठाएको छ भने नेपाल मजदुर किसान पार्टीले बागमतीबाट उम्मेदवारी दिएको छ। हाल राष्ट्रिय सभामा नेकपा सबैभन्दा ठूलो दल हो जसका २५ सदस्य छन्। यो निर्वाचनपछि विभिन्न दलका सदस्यहरूको पदावधि सकिँदैछ र नयाँ सदस्यहरू चयन हुनेछन्। राष्ट्रिय सभाको कुल सदस्य संख्या ५९ रहेको यो स्थायी सदन हो।