पोखरा, ३१ भदौ । गण्डकी प्रदेश सुरक्षा समन्वय समितिको बैठकले प्रदेशमा शान्ति र सुरक्षा कायम गर्न विभिन्न निर्णय गरेको छ। मुख्यमन्त्री सुरेन्द्रराज पाण्डेको अध्यक्षतामा बसेको बैठकले सुरक्षा व्यवस्थालाई थप प्रभावकारी बनाउने ६ वटा निर्णय गरेको हो।

बैठकमा भदौ २३ र २४ गते भएको आन्दोलनले शान्ति सुरक्षामा पारेको असरबारे छलफल भएको थियो। आन्दोलनका कारण भएको जनधनको क्षतिप्रति दुख व्यक्त गर्दै मृतकप्रति श्रद्धाञ्जली र घाइतेको स्वास्थ्यलाभको कामना गरिएको छ।

आन्दोलनका क्रममा सुरक्षाकर्मीबाट लुटिएका हतियार फिर्ता गर्न आह्वान गरिएको छ। फिर्ता नगर्नेलाई कानुनअनुसार कारबाही गरिने भएको छ। साथै, आगजनी, तोडफोड, लुटपाट र चोरीमा संलग्न व्यक्तिलाई पहिचान गरी कानुनी कारबाही गर्न सबै जिल्लाका सुरक्षा निकायलाई निर्देशन दिइएको छ।

बैठकले शान्ति कायम गर्न सुरक्षा निकायहरूलाई आपसी समन्वयमा काम गर्न, स्थानीय नागरिक समाजसँग सहकार्य गर्न र सूचना आदानप्रदान गर्न निर्देशन दिएको छ। वर्षायाममा हुन सक्ने विपद्को जोखिमलाई ध्यानमा राखी पूर्वतयारी र प्रतिकार्यमा सजग रहन पनि आग्रह गरिएको छ। साथै, चाडपर्वलाई लक्षित गरी विशेष सुरक्षा योजना बनाएर कार्यान्वयन गर्न समेत निर्णय भएको छ।