काठमाडौं, २३ भदौं । गृहमन्त्री रमेश लेखकले पदबाट राजीनामा दिएका छन्। सोमबार साँझ बालुवाटारमा बसेको मन्त्रिपरिषद् बैठकमा पुगेर उनले प्रधानमन्त्री केपी शर्मा ओलीसमक्ष राजीनामा बुझाएका हुन्।

“मन्त्रिपरिषद् बैठक भर्खरै सकियो, गृहमन्त्रीले राजीनामा दिनुभयो,” एक मन्त्रीले बताए। सोमबार जेन–जी युवाहरूले सामाजिक सञ्जाल बन्द र भ्रष्टाचारविरुद्ध काठमाडौं, पोखरा, वुटवल, इटहरीलगायतका मुख्य सहरमा प्रदर्शन गरेका थिए। स्कूल–कलेजको ड्रेसमै सहभागी १०–१२ कक्षाका विद्यार्थीहरूले बोकेका प्लेकार्डमा लेखिएको थियो, “असन्तुष्टि चरम छ, नेताको गोजी गरम छ। मेटाले भन्दा नेताले दुःख दिए।”

प्रदर्शनका क्रममा काठमाडौंमा १७ र इटहरीमा २ जनाको मृत्यु भएको छ भने ३०० भन्दा बढी घाइते भएका छन्। यही घटनापछि नेपाली कांग्रेसका महामन्त्रीहरू गगन थापा र विश्वप्रकाश शर्माले बूढानीलकण्ठमा बसेको पार्टी बैठकमा गृहमन्त्रीलाई नैतिकताका आधारमा राजीनामा दिन आग्रह गरेका थिए।

“असन्तुष्टि चरम छ, नेताको गोजी गरम छ। मेटाले भन्दा नेताले दुःख दिए।”

उक्त बैठकमा लेखकले प्रदर्शनका क्रममा भएको घटनाप्रति दुख व्यक्त गर्दै नैतिकताका आधारमा राजीनामा दिने बताएका थिए। लगत्तै उनी बालुवाटार पुगेर राजीनामा बुझाएका हुन्।

“दुई महामन्त्रीले यत्रो घटना हुँदा गृहमन्त्रीले नैतिकताका आधारमा राजीनामा दिनुपर्छ भन्ने कुरा सशक्त रूपमा उठाउनुभयो। सभापति शेरबहादुर देउवा मौन रहनुभयो। तर, गृहमन्त्रीले राजीनामा दिन्छु भन्दै मन्त्रिपरिषद् बैठकमा जानुभयो,” बैठकमा सहभागी एक पदाधिकारीले भने।

यसअघि कांग्रेस नेता शेखर कोइरालाले गृहमन्त्रीको मात्र नभई नेपाली कांग्रेसले समेत सरकार छाड्नुपर्ने बताएका थिए। “यो सरकारको औचित्य समाप्त भएको छ। गृहमन्त्रीले मात्र होइन, पार्टीले नै वर्तमान सरकारबाट बाहिरिनुपर्छ,” कोइरालाले भने ।