पोखरा, ११ भदौं । पोखरा महानगरपालिका वडा नं. ८, इन्द्रपुरी मार्गमा लागूऔषध कारोबारको सूचनाका आधारमा प्रहरीले एकजनालाई पक्राउ गरेको छ। मङ्गलवार दिउँसो २ बजेको समयमा लागूऔषध नियन्त्रण ब्यूरो शाखा कार्यालय पोखरा, जिल्ला प्रहरी कार्यालय कास्की र वडा प्रहरी कार्यालय बैदामको संयुक्त टोलीले छापा मारेको हो।

प्रहरीले स्थानीय ४६ वर्षीय रमेश थापाको घरमा खानतलासी गर्दा १६१ एम्पुल ब्रुफिनुर्फिन, १३५ एम्पुल डाइजापाम, १६४ एम्पुल फेनेरागन गरी कुल ४ सय ६० एम्पुल लागूऔषध बरामद गरेको छ। साथै, ४ किलो १०० ग्राम गाँजा, एक थान डिजिटल तराजु र एक थान मोबाइल पनि फेला परेको छ।

पक्राउ परेका थापालाई कास्की जिल्ला अदालतबाट लागूऔषधसम्बन्धी कसूरमा ६ दिनको म्याद थप गरी थप अनुसन्धान भइरहेको जिल्ला प्रहरी कार्यालय कास्कीका प्रवक्ता डीएसपी हरिबहादुर बस्नेतले जानकारी दिए।