पोखरा, २ असार । नेकपा माओवादी केन्द्र पोखरा महानगर कमिटीको अध्यक्षमा हरिप्रसाद भण्डारीको प्यानल नैं निर्वाचित भएको छ । जनकराज पराजुलीको प्यानललाई हराउँदैं भण्डारीको टिम विजयी भएको हो ।

भण्डारी नेतृत्वको पदाधिकारी प्यानलबाट उपाध्यक्षमा अर्जुन मल्ल, पुष्पकमल ढुंगाना र देवीमाया अधिकारी निर्वाचित भएका छन् । त्यस्तै, सहसचिवमा चन्द्रबहादुर गुरूङ र कोषाध्यक्षमा अनिल परियार निर्वाचित भएका छन्। कमिटीको सचिवमा सूर्यप्रकाश तिवारी भने सर्वसम्मत निर्वाचित भएका थिए ।

अध्यक्षका प्रतिस्पर्धीहरु जनकराज पराजुली र हरिप्रसाद भण्डारी

सर्वसम्मत नेतृत्व चयन हुन नसकेपछि लोकतान्त्रिक प्रक्रिया अवलम्बन गरेर निर्वाचनमार्फत् नेतृत्व टुंगो लगाएको माओवादी केन्द्रले जनाएको छ ।

नगर कमिटी गठन गर्न माओवादी केन्द्रले पोखरा महानगरका ३३ वडा वडाबाट १/१ जना, महिला, दलित, दलित महिला, जनजाति, युवा लगायत क्लस्टरबाट गरी ९९ सदस्यीय कमिटी गठन गर्नुपर्नेमा ३ जनाले मनोनयन दर्ता नगरेको जनाएको छ ।

अहिले निर्वाचित ८६ सदस्यबाट महानगर कमिटी अध्यक्षसहित पदाधिकारीमा दुइटा प्यानल बनाएर निर्वाचिन भएको थियो । माओवादी केन्द्रीय सदस्य राजकाजी गुरुङ ‘करण’ का अनुसार निर्वाचित कमिटीले १० प्रतिशत सदस्य मनोनयन गर्न पाउने छन् ।

महानगर कमिटीको अधिवेशनको उद्घाटन जेठ २७ गते नेकपा माओवादी केन्द्रका अध्यक्ष पुष्पकमल दाहाल प्रचण्डले गरेका थिए ।