पोखरा, २५ जेठ । अमरसिंह माध्यमिक विद्यालय, रामघाटका कम्प्युटर शिक्षक दिपक दाहालले आइतबार आज एक विद्यार्थीलाई मरणासन्न हुने गरी कुटपिट गरेका छन् । घाइते विद्यार्थीको पार्कल्याण्ड हस्पिटल अमरसिंहमा उपचार भईरहेको छ ।

कक्षा १० (ख) मा पढ्ने एकजना छात्रलाई कम्प्युटर शिक्षक दाहालले देव्रे साइडको कन्चट र कानको बिचको जोर्नींमा मुक्कै मुक्काले हानेका थिए । रिसले विक्षिप्त बनेका शिक्षक दाहालको कुटाईबाट विद्यार्थीको अनुहार भरी पनि चोट लागेको छ ।

घाइते विद्यार्थीको कानमा बढि चोट लागेको र श्रवण क्षमतामा समस्या देखिएको उपचारमा संलग्न अभिभावकले डन न्यूजलाई जानकारी दिए । घाइते विद्यार्थीका अनुसार आइतबार अन्तिम पिरियडमा ट्युसन क्लासका विषयमा जानकारी दिईरहँदा सामान्य हाँसेको विषयलाई लिएर उनीमाथि निर्घात कुटपिट भएको थियो ।

अमरसिंह माध्यमिक विद्यालय, पोखरा–१०, रामघाट ।

शिक्षक दाहालले किन हाँसेको भन्दैं निर्घात रुपमा कुटपिट गर्न थालेपछि अन्य छात्राहरु आत्तिएर रुवावासी गरेका थिए । एकदमैं पागल जसरी आक्रोशित भएर कुट्न थालेपछि विद्यार्थीहरु शुरुमा त डरले केही समय चुपचाप बसेको तर पछि कुट्दा कुट्दै सास नै फेर्न नसक्ने अवस्थामा साथी ढलेपछि सबै आत्तिएर साथी मर्यो सर छोडिदिनुस् न भन्दैं होहल्ला गरेको प्रत्यक्षदर्शी विद्यार्थीले अभिभावकलाई बताएका छन् ।

गर्दनमा समातेर विद्यार्थीलाई घोक्राउँदैं उनले कक्षा कोठाको सबैभन्दा अगाडि लगेर थप पिट्नका लागि एकजना विद्यार्थीलाई पाइप ल्याउन समेत लगाएका थिए । ती अर्का विद्यार्थीले पिट्न नमिल्ने खालको अलि लामो पाइप ल्याइदिएको विद्यार्थीहरुले बताए । त्यहीं बेलामा अर्का शिक्षक कक्षा कोठामा आईपुगेपछि मात्र बल्ल उनले पिट्न छाडेका थिए ।

विद्यार्थीका अनुसार यस अघि पनि शिक्षकले यसैंगरी एकजना विद्यार्थीको हात नैं भाँचिदिएका थिए । पटक-पटक विद्यार्थी यसरी कुटिईरहँदा पनि विद्यालय प्रशासनले आजसम्म कडाईका साथ कारवाही गरेको भने देखिदैंन ।

पोखराको शैक्षिक क्षेत्रमा बेग्लैं पहिचान बनाएको यस विद्यालयमा हुने यस्ता अराजक र अपराधिक घटनाले विद्यार्थीको मानसिकतामा पार्ने असर, त्रास र अभिभावकहरुले भोग्नु परेको सन्तापलाई समयमा नैं सम्बन्धित निकायले उचित सम्बोधन नगर्ने हो भने भयावह स्थिति आउने निश्चित छ ।

मरणासन्न हुने गरी विद्यार्थी कुट्ने शिक्षक दीपक दाहाल ।

शिक्षकको कुटाईबाट घाइते भएका विद्यार्थी