काठमाडौं, १३ जेठ । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले जेठ १५ गतेको पार्टीको कार्यक्रमलाई प्रधानमन्त्रीले भड्काउन खोजेको आरोप लगाएका छन् ।

मंगलबार सम्पादकहरूसँगको छलफलमा अध्यक्ष लिङ्देनले प्रधानमन्त्री केपी शर्मा ओलीको भनाईप्रति चिन्ता र संशय व्यक्त गरेका छन् । ‘प्रधानमन्त्री हाम्रो १५ जेठको कार्यक्रमलाई भड्काउन खोज्दै छन् । गलत भनाइ सच्याउने वा प्रधानमन्त्रीले नै राजीनामा दिनुपर्ने स्तरको अभिव्यक्ति प्रधानमन्त्री ओलीबाट आयो,’ उनले भने ।

संविधानले दिएको स्वतन्त्रता सरकारले कुण्ठित गर्न खोजेको उनको आरोप छ । त्यसो त प्रधानमन्त्री ओलीको भनाईले नागरिकको स्वतन्त्रतामाथि नै धावा बोलिएको भन्दैं चौतर्फी विरोध भईरहेको छ ।

‘हामीले रत्नपार्कबाट कार्यक्रम गर्ने भन्दा प्रधानमन्त्रीको दलले त्यहीँ नजिकै कार्यकर्ता बोलाएर भिडाउन खोजेका छन् । पत्रकारहरूले यसमा निष्पक्ष भएर समाचार सम्प्रेषण गरिदिनु प¥यो,’ लिङ्देनले भने ।

राजावादीहरूले १५ जेठमा राजा फर्काउने आह्वानसहित आन्दोलन घोषणा गरेका छन् । ठिक त्यसै दिन एमाले अध्यक्ष एवं प्रधानमन्त्री केपी शर्मा ओलीले काठमाडौं नेकपा एमालेको नियन्त्रणमा हुनुपर्ने भन्दै कार्यकर्तालाई सोही अनुसार आवश्यक तयारी गर्न निर्देशन दिएका थिए ।

यस अघि राष्ट्रिय मानवअधिकार आयोगले प्रधानमन्त्री ओलीको भनाइमा चिन्ता व्यक्त गर्दै विज्ञप्ति जारी गरेको छ । आयोगले राजनीतिक दलहरूले आन्दोलन गर्दा मानवअधिकार उल्लंघन नहोस् भनी अपिल गरेको छ ।

आयोगले यस घटनालाई गम्भीरतापूर्वक लिएको जनाएको छ । सरकारलाई नागरिक अधिकार र शान्तिपूर्ण सभा गर्ने अधिकारमाथि कुनै पनि अतिक्रमण नगर्न आयोगले आग्रह गरेको छ । साथै, सुरक्षा निकायहरूलाई पनि कुनै पनि राजनीतिक कार्यक्रममा निष्पक्ष रहन निर्देशन दिएको छ ।

दलहरु चरम भ्रष्टाचार र वेथितिमा डुबेपछि उत्पन्न जनताको वितृष्णा र असहमतिको आवाजसँग गणतन्त्रवादी हुँ भन्ने दलहरु सबै डराएका छन् । आफ्नै हर्कत र वेथितिले गणतन्त्रको आयु छोट्याउँदैं देशलाई भ्रष्टाचारको दलदलमा डुबाएका दलहरु कतैं राजा फर्कने त होइनन् ? भन्ने डर र त्रासमा देखिन्छन् । त्यसैले गणतन्त्र स्थापनासँगैं संविधानले दिएको नागरिकको हक र अधिकारलाई कुण्ठित पार्दै प्रधानमन्त्री ओलीले तुच्छ अभिव्यक्ति दिएका थिए ।