दमौंली, ११ जेठ । पृथ्वीराजमार्गअन्तर्गत तनहुँको व्यास नगरपालिकाको वडा नम्बर ३ र ४ जोड्ने मादी नदीको पुलबाट शनिबार राति करिब ११:३० बजेको समयमा जीप खस्दा तीन युवाको मृत्यु भएको छ ।

जीप दुर्घटनामा परी मृत्यु हुनेमा व्यास–५ का ३५ वर्षीय प्रविन थापामगर, सोही ठाउँका २२ वर्षीय कुमार थापा र २० वर्षीय कुशल थापा रहेका जिल्ला प्रहरी कार्यालय तनहुँका प्रहरी निरीक्षक राजु अधिकारीले जानकारी दिए ।

दमौलीबाट चापाघाटतर्फ जाँदै गरेको ग २ च ५७६० नम्बरको उक्त जिप मादी नदी पुलको रेलिङ भत्काएर नदीमा खसेको थियो । जिपमा सवार रहेका पाँचजना मध्ये दुईजना घाइते भएका थिए । घाइते मध्ये एकजनाको अवस्था गम्भीर छ । उनलाई दमौली अस्पतालमा प्राथमिक उपचार पश्चात् पोखरा रिफर गरिएको प्रहरीले जानकारी दिएको छ ।

दुर्घटनामा परेको जीपका चालकको अवस्था भने सामान्य रहेको छ । दुर्घटनाका घाइतेलाई नेपाली सेनाको कालीभञ्जन गण, नेपाल प्रहरी र स्थानीयले उद्धार गरेका थिए । उक्त घटना सम्बन्धी थप अनुसन्धान भइरहेको जिल्ला प्रहरी कार्यलय तनहुँले जनाएको छ ।