पोखरा, २० जेठ । चोरीको साईकल किनबेच गर्दै गर्दा पोखराको जिरोकिमीबाट प्रहरीले चारजनालाई पक्राउ गरेको छ । वडा प्रहरी कार्यालय बैदामबाट खटिएको टोलीले फर्निचर उद्योगभित्र चोरीका साईकलहरु किनबेच भईरहेको अवस्थामा प्रहरीले बिहीबार उनीहरुलाई पक्राउ गरेको हो ।

पोखरा–५, जिरोकिमीस्थित भीमसेन थामीको फर्निचर उद्योग भित्र चोरी गरेर ल्याईएका ६ थान साईकलसहित दुई बालक पक्राउ परेका हुन् । प्रहरीका अनुसार यसरी पक्राउ पर्नेमा पोखरा–५, जिरो बस्ने १४ वर्षीय एक बालक, सोही ठाउँ बस्ने १७ वर्षका एक बालक, स्याङ्जा फेदिखोला गाउँपालिका वडा नं. ६ घर भई सोही ठाउँ बस्ने २४ वर्षीय मदन सुनार र फर्निचर उद्योग सञ्चालक ५१ वर्षीय भीमसेन थामीलाई पक्राउ गरेको जिल्ला प्रहरी कार्यालय कास्कीका सूचना अधिकारी डिएसपी बसन्तकुमार शर्माले जानकारी दिएका छन् ।