पोखरा, २४ चैत । अवैध हतियार, मृगको छाला र मासुसहित पोखरा–२०, भलामखोर बस्ने दीपेन्द्र केसीलाई आईतबार आज प्रहरीले पक्राउ गरेको छ । आइतबार दिउँसो १२ बजेको समयमा अवैध रुपमा वन्यजन्तुको शिकार गर्ने गरेको गोप्य सूचनाको आधारमा वडा प्रहरी कार्यालय बगरबाट खटिएको टोलीले केसीलाई पक्राउ गरेको हो ।

४२ वर्षीय केसीको घरभित्र लुकाई छिपाई राखेको अवस्थामा अवैध हतियार २ नाले बन्दुक १ थान, उक्त हतियारमा लाग्ने खोका खोली (टोटा) १३ थान, भरी खोका १ थान, बारुद जस्तो देखिने कालो पदार्थ २० ग्राम, छर्रा बनाउन प्रयोग गरिने मेटल जस्तो पदार्थ ७७६ ग्राम र बारुद बनाउन प्रयोग गरिने पहेंलो रंगको धुलो पदार्थ ३६० ग्राम र सेता रंगको पदार्थ ३४५ ग्राम प्रहरीले बरामद गरेको छ ।

केसीको घरबाट मृगको जस्तो देखिने छाला १ थान, आलो मासु खुट्टा र पुच्छरसहितको ८०० ग्राम र ३ थान टर्च लाईट पनि खोजतलासका क्रममा भेट्टिएको थियो । पक्राउ परेका केसीलाई जिल्ला अदालत कास्कीबाट थप अनुसन्धानका लागि ७ दिनको म्याद थप गरिएको छ । साथै अवैध वन्यजन्तुको चोरी शिकारी गरेको कसुरमा जिल्ला वन कार्यालय कास्कीमा थप अनुसन्धानको लागि उक्त मासु र छाला सहित पठाउने तयारी प्रहरीले गरेको जिल्ला प्रहरी कार्यालयबाट प्रेषित ईमेलमा उल्लेख छ ।